ചെന്നൈ: വിവാഹമോചന ഹർജിയുമായി ബന്ധപ്പെട്ട വിവാദങ്ങളിൽ ആദ്യമായി പ്രതികരിച്ച് നടനും തമിഴക വെട്രി കഴകം (TVK) നേതാവുമായ വിജയ്. നിലവിൽ ഉയർന്നിരിക്കുന്ന പ്രശ്നങ്ങൾ താൻ തന്നെ പരിഹരിക്കാമെന്നാണ് താരം വ്യക്തമാക്കിയത്. ടിവികെ വനിതാ ദിനാഘോഷ പരിപാടിയിൽ സംസാരിക്കവെയായിരുന്നു വിജയിയുടെ പ്രതികരണം.
“എന്നെ ചുറ്റിപ്പറ്റി ചില പ്രശ്നങ്ങൾ നടക്കുന്നുണ്ട്. അത് ഞാൻ നോക്കിക്കോളാം. നിങ്ങൾ അതോർത്ത് വിഷമിക്കേണ്ട. നിങ്ങൾ വിഷമിക്കുന്നത് എന്നെ വേദനിപ്പിക്കുന്നു. ഈ പ്രശ്നങ്ങൾക്ക് വലിയ പ്രാധാന്യമില്ല,” എന്നായിരുന്നു വിജയിയുടെ വാക്കുകൾ.
നടന് മറ്റൊരു നടിയുമായി ബന്ധമുണ്ടെന്ന് ആരോപിച്ച് ഭാര്യ സംഗീത വിവാഹമോചനക്കേസ് നൽകിയതോടെയാണ് വിവാദം ഉയർന്നത്. ഈ നടി തൃഷയാണെന്ന തരത്തിലുള്ള അഭ്യൂഹങ്ങളും സോഷ്യൽ മീഡിയയിൽ പരന്നിരുന്നു. എന്നാൽ ഈ ആരോപണങ്ങളെക്കുറിച്ച് വിജയ് ഇതുവരെ പ്രതികരിച്ചിരുന്നില്ല.
2021 മുതലാണ് വിജയിയും സംഗീതയും തമ്മിലുള്ള ദാമ്പത്യജീവിതത്തിൽ പ്രശ്നങ്ങൾ ആരംഭിച്ചതെന്നാണ് റിപ്പോർട്ടുകൾ. പരസ്പര സമ്മതത്തോടെയുള്ള വിവാഹമോചനത്തിന് സംഗീത തയ്യാറായിരുന്നെങ്കിലും രാഷ്ട്രീയ ഭാവിയെ ബാധിക്കുമെന്ന ആശങ്കയിൽ വിജയ് ആദ്യം സമ്മതിച്ചില്ലെന്നാണ് വിവരം. തുടർന്ന് സംഗീത കോടതിയെ സമീപിക്കുകയായിരുന്നു.