കുവൈത്ത് സിറ്റി: കുവൈത്തിലെ ജഹ്റ ആശുപത്രിയുമായി ബന്ധപ്പെട്ട കെട്ടിടത്തിലെ ഇലക്ട്രിക്കൽ മുറിയിൽ തീപിടിത്തമുണ്ടായി. തിങ്കളാഴ്ച പുലർച്ചെയായിരുന്നു അപകടം. തീപിടുത്തം വേഗത്തിൽ നിയന്ത്രണവിധേയമാക്കിയതായി ആരോഗ്യ മന്ത്രാലയം അറിയിച്ചു. ആർക്കും പരിക്കുകളോ ആളപായമോ റിപ്പോർട്ട് ചെയ്തിട്ടില്ലെന്ന് ഉദ്യോഗസ്ഥർ സ്ഥിരീകരിച്ചു. സുരക്ഷാ സംവിധാനം യാന്ത്രികമായി ഫയർ സ്പ്രിംഗളറുകൾ പ്രവർത്തനക്ഷമമാക്കി. അടിയന്തര പദ്ധതികളും സജീവമാക്കി.
മുൻകരുതലിന്റെ ഭാഗമായി സമീപത്തുള്ള രോഗികളെ ഒഴിപ്പിച്ചതായി മന്ത്രാലയം പ്രസ്താവനയിൽ വിശദീകരിച്ചു. കുവൈത്ത് ഫയർ ഫോഴ്സ് (കെ.എഫ്.എഫ്), ആഭ്യന്തര മന്ത്രാലയം, മെഡിക്കൽ സ്റ്റാഫ് എന്നിവ വേഗത്തിൽ ഇടപെട്ട് പ്രശ്നം പരിഹരിച്ചു. എല്ലാ വിഭാഗങ്ങളുടെയും വേഗത്തിലുള്ളതും കുറ്റമറ്റതുമായ പ്രതികരണത്തെ ആരോഗ്യ മന്ത്രാലയം പ്രശംസിച്ചു.
ആശുപത്രിയിലെ സുരക്ഷാ സംവിധാനങ്ങൾ ഉടനടി പ്രതികരിച്ചുവെന്നും, ഓട്ടോമാറ്റിക് ഫയർ സ്പ്രിംഗളറുകൾ സജീവമാക്കി അടിയന്തര പ്രതികരണ പദ്ധതി ഉടൻ നടപ്പിലാക്കിയെന്നും മന്ത്രാലയം ഔദ്യോഗിക പ്രസ്താവനയിൽ പറഞ്ഞു. സ്ഥിതിഗതികൾ നേരിട്ട് വിലയിരുത്തുന്നതിനായി ഇൻഫർമേഷൻ മന്ത്രിയും ആക്ടിംഗ് ആരോഗ്യ മന്ത്രിയുമായ അബ്ദുൾറഹ്മാൻ അൽ-മുതൈരിയും ആരോഗ്യ മന്ത്രാലയ അണ്ടർസെക്രട്ടറിയും സ്ഥലം സന്ദർശിച്ചു. ജനറൽ ഫയർ ഫോഴ്സ്, ആഭ്യന്തര മന്ത്രാലയം, ആരോഗ്യ സംരക്ഷണ ജീവനക്കാർ, എല്ലാ സഹായ ഏജൻസികൾ എന്നിവരുടെയും വേഗത്തിലുള്ളതും പ്രൊഫഷണലുമായ പ്രതികരണത്തെ മന്ത്രാലയം പ്രശംസിച്ചു.