റിയാദ്: രാജ്യത്തെ വിസാ സേവനങ്ങൾ കൂടുതൽ കാര്യക്ഷമവും സുതാര്യവുമായി മാറ്റുന്നതിനായി എല്ലാ വിസാ നടപടികളും ഒരൊറ്റ ഡിജിറ്റൽ പ്ലാറ്റ്ഫോമിന് കീഴിൽ ഏകോപിപ്പിക്കാൻ സൗദി അറേബ്യ തീരുമാനിച്ചു. യൂണിഫൈഡ് നാഷണൽ വിസാ പ്ലാറ്റ്ഫോം സ്ഥാപിക്കാൻ സൗദി മന്ത്രിസഭ അംഗീകാരം നൽകി.
ജിദ്ദയിൽ കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാന്റെ അധ്യക്ഷതയിൽ ചേർന്ന മന്ത്രിസഭാ യോഗത്തിലാണ് തീരുമാനം. വിദേശകാര്യ മന്ത്രാലയത്തിന്റെ കീഴിൽ പ്രവർത്തിക്കുന്ന പുതിയ പ്ലാറ്റ്ഫോം വഴി തൊഴിൽ, കുടുംബ സന്ദർശനം, ബിസിനസ്, ടൂറിസ്റ്റ് തുടങ്ങി വിവിധ വിഭാഗങ്ങളിലെ വിസാ സേവനങ്ങൾ ഒരിടത്ത് നിന്ന് ലഭ്യമാകും.
വിസാ അപേക്ഷ സമർപ്പിക്കൽ, ആവശ്യമായ രേഖകൾ അപ്ലോഡ് ചെയ്യൽ, അപേക്ഷയുടെ പുരോഗതി തത്സമയം പരിശോധിക്കൽ, അനുമതി സ്വീകരിക്കൽ തുടങ്ങിയ എല്ലാ നടപടികളും കൂടുതൽ ലളിതവും വേഗത്തിലുമാകുമെന്നാണ് അധികൃതരുടെ പ്രതീക്ഷ. നിലവിൽ വിവിധ വിസാ വിഭാഗങ്ങൾക്കായി വ്യത്യസ്ത പ്ലാറ്റ്ഫോമുകൾ ഉപയോഗിക്കേണ്ട സാഹചര്യം ഇതോടെ ഒഴിവാകും.
സൗദിയിലെ ഇന്ത്യൻ പ്രവാസികൾ ഉൾപ്പെടെ വിദേശികൾക്ക് പുതിയ സംവിധാനം ഏറെ പ്രയോജനകരമാകുമെന്നാണ് വിലയിരുത്തൽ. പ്രത്യേകിച്ച് കുടുംബ സന്ദർശന വിസയ്ക്കുള്ള അപേക്ഷാ നടപടികൾ കൂടുതൽ എളുപ്പവും വേഗത്തിലുമാകും.
ഡിജിറ്റൽ ഭരണസംവിധാനങ്ങൾ ശക്തിപ്പെടുത്തുന്നതിനുള്ള സൗദിയുടെ വിപുലമായ പദ്ധതിയുടെ ഭാഗമായാണ് ഈ പുതിയ വിസാ പ്ലാറ്റ്ഫോം നടപ്പാക്കുന്നത്. ഭരണനടപടികൾ വേഗത്തിലാക്കുകയും ഉപയോക്തൃ സൗഹൃദ സേവനങ്ങൾ ഉറപ്പാക്കുകയും ചെയ്യുക എന്നതാണ് പദ്ധതിയുടെ ലക്ഷ്യം.
English Summary:
Saudi Arabia has approved a unified national digital visa platform to streamline all visa services under one system. The new platform will simplify applications, document uploads, approvals, and status tracking for employment, family visit, business, and tourist visas, benefiting both citizens and expatriates.