ന്യൂഡൽഹി: കേന്ദ്ര മന്ത്രിസഭയിൽ വിപുലീകരണത്തിനും പുനഃസംഘടനയ്ക്കും സാധ്യതയുണ്ടെന്ന റിപ്പോർട്ടുകൾക്കിടെ കേന്ദ്രമന്ത്രിമാരുടെ നിർണ്ണായക യോഗം വിളിച്ച് പ്രധാനമന്ത്രി നരേന്ദ്രമോദി.
മേയ് 21-ന് നടക്കുന്ന യോഗത്തിൽ എല്ലാ കേന്ദ്ര കാബിനറ്റ് മന്ത്രിമാരും സ്വതന്ത്ര ചുമതലയുള്ള സഹമന്ത്രിമാരും മറ്റ് സഹമന്ത്രിമാരും പങ്കെടുക്കുമെന്ന് ഔദ്യോഗിക വൃത്തങ്ങൾ സൂചിപ്പിക്കുന്നു. വിവിധ സർക്കാർ പദ്ധതികളുടെയും പരിപാടികളുടെയും നടത്തിപ്പ് വിലയിരുത്തുന്നതിനൊപ്പം വിവിധ മന്ത്രാലയങ്ങളുടെയും വകുപ്പുകളുടെയും പ്രവർത്തനങ്ങൾ യോഗം അവലോകനം ചെയ്യുമെന്നാണ് റിപ്പോർട്ടുകൾ.
മൂന്നാം മോദി സർക്കാരിന്റെ മൂന്നാം വാർഷികത്തിന് മുന്നോടിയായി നടക്കുന്ന ഈ യോഗത്തിന് വലിയ രാഷ്ട്രീയ പ്രാധാന്യമുണ്ട്. ജൂൺ രണ്ടാം വാരത്തോടെ മന്ത്രിസഭാ വിപുലീകരണവും അഴിച്ചുപണിയും നടന്നേക്കുമെന്ന ഊഹാപോഹങ്ങൾ രാഷ്ട്രീയ വൃത്തങ്ങളിൽ ശക്തമാണ്.
പശ്ചിമബംഗാൾ, അസം നിയമസഭാ തിരഞ്ഞെടുപ്പുകളിലെ ബിജെപിയുടെ മികച്ച പ്രകടനവും പുതുച്ചേരിയിൽ എൻഡിഎ സർക്കാർ അധികാരത്തിൽ വന്നതും ഈ പുനഃസംഘടനയെ സ്വാധീനിച്ചേക്കാം.