തിരൂരങ്ങാടി: മലപ്പുറം ജില്ല വിഭജിച്ച് തിരൂരങ്ങാടി കേന്ദ്രമാക്കി പുതിയ ജില്ല രൂപീകരിക്കണമെന്ന് മുസ്ലിം യൂത്ത് ലീഗ് ആവശ്യപ്പെട്ടു. തിരൂരങ്ങാടി മണ്ഡലം പ്രതിനിധി സമ്മേളനത്തിൽ ഇതുസംബന്ധിച്ച പ്രമേയം പാസാക്കി. മുസ്ലിം ലീഗ് നേതാക്കളും പങ്കെടുത്ത സമ്മേളനത്തിലാണ് ആവശ്യം ഉയർന്നത്.
വലിയ ജനസംഖ്യയുള്ള ജില്ലകളുടെ ഭരണസൗകര്യം മെച്ചപ്പെടുത്തുന്നതിനായി പുനഃസംഘടന അനിവാര്യമാണെന്ന് പ്രമേയത്തിൽ ചൂണ്ടിക്കാട്ടുന്നു. നിലവിൽ ലഭിക്കാതെ പോകുന്ന വികസന ആനുകൂല്യങ്ങളും ഭരണസേവനങ്ങളും കൂടുതൽ കാര്യക്ഷമമായി എത്തിക്കാനാകും എന്നതാണ് യൂത്ത് ലീഗിന്റെ നിലപാട്.
ജില്ല വിഭജനവുമായി ബന്ധപ്പെട്ട് മുസ്ലിം ലീഗ് സംസ്ഥാന നേതൃത്വം ഇതുവരെ ഔദ്യോഗിക നിലപാട് പ്രഖ്യാപിച്ചിട്ടില്ല. വിഷയത്തിൽ സംസ്ഥാന നേതൃത്വം എടുക്കുന്ന തീരുമാനം ശ്രദ്ധേയമാകും.
അതേസമയം, സിപിഎം മലപ്പുറം ജില്ലാ സെക്രട്ടറി വി.പി. അനിൽ മുസ്ലിം ലീഗിനെതിരെ വിമർശനവുമായി രംഗത്തെത്തി. ലീഗ് പ്രഖ്യാപിത നയങ്ങളിൽ നിന്ന് വ്യതിചലിച്ചുവെന്നും വിമർശനങ്ങളെ മലപ്പുറം ജില്ലയ്ക്കും മുസ്ലിം സമൂഹത്തിനുമെതിരായ ആക്രമണമായി ചിത്രീകരിക്കുകയാണെന്നും അദ്ദേഹം ആരോപിച്ചു.
മലപ്പുറം എല്ലാ വിഭാഗം ജനങ്ങളുടെയും ജില്ലയാണെന്നും അതിന്റെ കുത്തകാവകാശം ഒരേയൊരു പാർട്ടിക്കു മാത്രം അവകാശപ്പെടാനാകില്ലെന്നും വി.പി. അനിൽ പറഞ്ഞു. നിലവിലെ രാഷ്ട്രീയ സാഹചര്യത്തിൽ അധികാരം ലക്ഷ്യമിട്ട് ലീഗ് വർഗീയ ശക്തികളുമായി സഹകരിക്കുകയാണെന്നും അദ്ദേഹം ആരോപിച്ചു.
English Summary
The Muslim Youth League has demanded the bifurcation of Malappuram district and the formation of a new district with Tirurangadi as headquarters. The resolution was passed at a local conference. CPM leaders criticized the demand, alleging political motives and divisive strategies.