കോഴിക്കോട് ചേവായൂർ പൊലീസ് സ്റ്റേഷൻ പരിധിയിൽ അപ്പാർട്ട്മെന്റിൽ കയറി മോഷണം നടത്തിയ രണ്ട് പേരെ പൊലീസ് അറസ്റ്റ് ചെയ്തു. കാരപ്പറമ്പ് പുഴനടമ്മൽ സ്വദേശി നൗഫൽ (30), കുന്ദമംഗലം കോണാട്ട് സ്വദേശി ഷാമിൽ മുഹമ്മദ് (30) എന്നിവരാണ് പിടിയിലായത്.
ഏപ്രിൽ 24-നാണ് തടമ്പാട്ടുത്താഴത്തെ ഒരു അപ്പാർട്ട്മെന്റിൽ നിന്ന് മൂന്ന് തബലകളും ഏകദേശം 5000 രൂപ വിലവരുന്ന ചെരിപ്പും മോഷണം പോയത്. അപ്പാർട്ട്മെന്റിലെ താമസക്കാരിയുടെ പരാതിയെ തുടർന്ന് ചേവായൂർ പൊലീസ് കേസെടുത്ത് അന്വേഷണം ആരംഭിച്ചു.
സമീപ പ്രദേശങ്ങളിലെ സിസിടിവി ദൃശ്യങ്ങൾ പരിശോധിച്ച പൊലീസ് പ്രതികളെയും അവർ ഉപയോഗിച്ച വാഹനവും തിരിച്ചറിഞ്ഞു. തുടർന്ന് സൈബർ സെല്ലിന്റെ സഹായത്തോടെ നടത്തിയ അന്വേഷണത്തിലാണ് പ്രതികളെ കുന്ദമംഗലത്തും ചേവായൂരിലും നിന്ന് പിടികൂടിയത്.
നൗഫലിനെതിരെ മുൻപ് നടക്കാവ് പൊലീസ് സ്റ്റേഷൻ പരിധിയിൽ പൊതുസ്ഥലത്ത് മദ്യപിച്ചതിനും മയക്കുമരുന്ന് ഉപയോഗിച്ചതിനും കേസുകൾ ഉണ്ടായിരുന്നുവെന്ന് പൊലീസ് അറിയിച്ചു. ഇൻസ്പെക്ടർ മഹേഷ് പി നേതൃത്വത്തിലുള്ള അന്വേഷണ സംഘമാണ് പ്രതികളെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.
English Summary
Two men were arrested in Kozhikode for stealing tablas and footwear worth ₹5,000 from an apartment under the Chevayur police station limits. The accused were identified through CCTV footage and tracked with the help of the cyber cell. Both were later apprehended from different locations and remanded by the court.