തിരുവനന്തപുരം: സംസ്ഥാനത്ത് പുതിയ മന്ത്രിസഭ രൂപീകരണം വൈകുന്ന സാഹചര്യത്തിലും എസ്എസ്എൽസി പരീക്ഷാഫലം പ്രഖ്യാപിക്കുന്നത് വൈകില്ലെന്ന് പൊതുവിദ്യാഭ്യാസ വകുപ്പ്. ഈ മാസം 15ന് തന്നെ ഫലം പ്രസിദ്ധീകരിക്കാനുള്ള നടപടികൾ വേഗത്തിലാക്കിയതായി അധികൃതർ അറിയിച്ചു. വിദ്യാർത്ഥികളുടെ ഹയർ സെക്കൻഡറി പ്രവേശന നടപടികൾ തടസപ്പെടാതിരിക്കാനാണ് അടിയന്തര നീക്കം.
നിയമസഭാ തെരഞ്ഞെടുപ്പിന് പിന്നാലെ പുതിയ മുഖ്യമന്ത്രി ആരാകണമെന്ന കാര്യത്തിൽ ഇതുവരെ അന്തിമ തീരുമാനം ഉണ്ടായിട്ടില്ല. ഇതോടെ പുതിയ മന്ത്രിസഭ അധികാരമേൽക്കുന്നതും വൈകുകയാണ്. സാധാരണയായി വിദ്യാഭ്യാസ മന്ത്രിയാണ് എസ്എസ്എൽസി ഫലം പ്രഖ്യാപിക്കാറുള്ളത്. എന്നാൽ നിലവിലെ പ്രത്യേക സാഹചര്യത്തിൽ ചീഫ് സെക്രട്ടറിയോ പൊതുവിദ്യാഭ്യാസ ഡയറക്ടറോ ഫലപ്രഖ്യാപനം നടത്താനാണ് സാധ്യത.
2021ലെ തെരഞ്ഞെടുപ്പ് സമയത്തും സമാന സാഹചര്യം നിലനിന്നപ്പോൾ അന്നത്തെ പൊതുവിദ്യാഭ്യാസ സെക്രട്ടറി കെ. ഷാജഹനായിരുന്നു ഫലം പ്രഖ്യാപിച്ചത്. അതേ മാതൃക ഇത്തവണയും പിന്തുടരാനാണ് വിദ്യാഭ്യാസ വകുപ്പിന്റെ ആലോചന.
പരീക്ഷയുടെ മൂല്യനിർണയം, ഡാറ്റാ എൻട്രി ഉൾപ്പെടെയുള്ള സാങ്കേതിക നടപടികൾ പൂർത്തിയായതായി വിദ്യാഭ്യാസ വകുപ്പ് അറിയിച്ചു. പരീക്ഷാ ബോർഡ് യോഗത്തിന് ശേഷം ഫലം ഔദ്യോഗികമായി അംഗീകരിക്കും. തുടർന്ന് ചീഫ് സെക്രട്ടറിയുടെ അനുമതിയോടെ പ്രഖ്യാപനം നടത്തും.
ഫലം വൈകുന്നത് പ്ലസ് വൺ പ്രവേശന നടപടികളെ ബാധിക്കുമെന്ന ആശങ്ക അധ്യാപക സംഘടനകളും ഉയർത്തിയിരുന്നു. ഇതോടെയാണ് സർക്കാർ രൂപീകരണത്തിനായി കാത്തുനിൽക്കാതെ ഉദ്യോഗസ്ഥ തലത്തിൽ ഫലം പ്രഖ്യാപിക്കാൻ തീരുമാനം ഉണ്ടായത്.
English Summary
The Kerala General Education Department is preparing to announce the SSLC examination results on May 15 despite delays in the formation of the new state cabinet. Officials said all technical procedures, including valuation and data entry, have been completed, and the results may be declared by the Chief Secretary or Director of Public Instruction if a new Education Minister is not appointed in time.