കോട്ടയം: മന്ത്രിസ്ഥാനം തന്റെ മുൻഗണനയല്ലെന്ന് വ്യക്തമാക്കി ചാണ്ടി ഉമ്മൻ. അതുസംബന്ധിച്ച തീരുമാനം മുഖ്യമന്ത്രിയും പാർട്ടി നേതൃത്വവുമാണ് എടുക്കേണ്ടതെന്നും അദ്ദേഹം പറഞ്ഞു. എൽഡിഎഫിന്റെ തോൽവി യുഡിഎഫിന് മുന്നറിയിപ്പാണെന്നും, 10 വർഷത്തെ നേട്ടങ്ങൾ പോലും ജനങ്ങളോട് വ്യക്തമാക്കാൻ കഴിഞ്ഞില്ലെന്നതാണ് സർക്കാരിന്റെ വലിയ വീഴ്ചയെന്നും അദ്ദേഹം വിമർശിച്ചു.
മുഖ്യമന്ത്രി പദവുമായി ബന്ധപ്പെട്ട് തർക്കമൊന്നുമില്ലെന്നും, അഭിപ്രായ വ്യത്യാസം തർക്കമല്ലെന്നും ചാണ്ടി ഉമ്മൻ പറഞ്ഞു. മുഖ്യമന്ത്രിയെ തീരുമാനിക്കുന്നത് ഹൈക്കമാൻഡായിരിക്കുമെന്നും അദ്ദേഹം കൂട്ടിച്ചേർത്തു. തിരഞ്ഞെടുപ്പ് നടപടിക്രമങ്ങളിലും വിമർശനം ഉന്നയിച്ച അദ്ദേഹം, തിരഞ്ഞെടുപ്പ് കമ്മീഷൻ തെരഞ്ഞെടുപ്പ് നടത്തുന്ന രീതി പരിഷ്കരിക്കേണ്ടതുണ്ടെന്നും പറഞ്ഞു. പുതുപ്പള്ളിയിലടക്കം പല നിയമങ്ങളും പാലിക്കാതെയാണു തെരഞ്ഞെടുപ്പ് പ്രവർത്തനങ്ങൾ നടന്നതെന്നും ആരോപിച്ചു.
അതേസമയം, പുതുപ്പള്ളിയുടെ വികസനത്തിനായി ഐപിഎൽ നിലവാരത്തിലുള്ള സ്റ്റേഡിയം രണ്ടര വർഷത്തിനുള്ളിൽ കൊണ്ടുവരാൻ ശ്രമിക്കുമെന്നും, പ്രദേശത്തെ ഐടി ഹബ്ബാക്കി മാറ്റുന്നതിനുള്ള പദ്ധതികളും ആലോചിക്കുന്നുണ്ടെന്നും ചാണ്ടി ഉമ്മൻ വ്യക്തമാക്കി.