ലഖ്നൗ: ഗോമതി നഗർ റെയിൽവേ സ്റ്റേഷനിൽ ട്രെയിനിൽ നിന്ന് തലയറ്റ നിലയിൽ കണ്ടെത്തിയ മൃതദേഹം ഉത്തർപ്രദേശിലെ കുഷിനഗർ സ്വദേശിയായ യുവതിയുടേതാണെന്ന് പൊലീസ് തിരിച്ചറിഞ്ഞു. സംഭവത്തിൽ ദുരഭിമാനക്കൊലയാണെന്ന സംശയത്തിലാണ് അന്വേഷണം പുരോഗമിക്കുന്നത്.
മേയ് 17-നാണ് ചപ്രാ–ഗോമതി നഗർ എക്സ്പ്രസിന്റെ എസ്-1 സ്ലീപ്പർ കോച്ചിൽ നിന്ന് മൃതദേഹഭാഗങ്ങൾ കണ്ടെത്തിയത്. അഞ്ച് കഷണങ്ങളാക്കി മുറിച്ച നിലയിൽ പെട്ടിക്കുള്ളിലായിരുന്നു മൃതദേഹം. ശരീരഭാഗങ്ങൾ ഒരു പെട്ടിയിലും കൈകാലുകൾ പോളിത്തീൻ ബാഗുകളിലുമായി പൊതിഞ്ഞ നിലയിലുമായിരുന്നു കണ്ടെത്തിയത്.
സിസിടിവി ദൃശ്യങ്ങളും മറ്റ് ഇലക്ട്രോണിക് തെളിവുകളും പരിശോധിച്ചാണ് യുവതിയെ തിരിച്ചറിഞ്ഞത്. കുടുംബത്തിൽ കുറച്ചുകാലമായി പ്രശ്നങ്ങൾ നിലനിന്നിരുന്നുവെന്ന സൂചന പൊലീസിന് ലഭിച്ചിട്ടുണ്ട്. യുവതിയുടെ പ്രണയബന്ധത്തെ വീട്ടുകാർ എതിർത്തിരുന്നതായും അതാണ് കൊലപാതകത്തിലേക്ക് നയിച്ചതോയെന്നുമാണ് അന്വേഷണ സംഘം പരിശോധിക്കുന്നത്.
സംഭവത്തിൽ യുവതിയുടെ പിതാവിനും ഒരു ബന്ധുവിനും പങ്കുണ്ടെന്ന സംശയത്തിലാണ് പൊലീസ്. കുടുംബാംഗങ്ങളെ ചോദ്യം ചെയ്ത് വരികയാണ്. ഇതുവരെ ആരുടെയും അറസ്റ്റ് രേഖപ്പെടുത്തിയിട്ടില്ല. കൊലപാതകത്തിന് ഉപയോഗിച്ച ആയുധവും യുവതിയുടെ തലയുടെ ഭാഗവും കണ്ടെത്താനുള്ള ശ്രമം തുടരുന്നതായി അധികൃതർ അറിയിച്ചു.
English Summary
Police identified the headless body found inside a train at Gomti Nagar railway station as that of a young woman from Kushinagar, Uttar Pradesh. The body was found chopped into pieces inside a suitcase and bags. Investigators suspect an honour killing linked to opposition from the victim’s family over her relationship. Police are questioning family members, including the victim’s father and a relative.