എടപ്പാൾ: പുതിയ അധ്യയന വർഷത്തിൽ പൊതുവിദ്യാലയങ്ങളിൽ ചേരുന്ന കുട്ടികൾക്ക് രേഖകളുടെ അഭാവം കാരണം പ്രവേശനം നിഷേധിക്കില്ല.
ജനന സർട്ടിഫിക്കറ്റോ ആധാറോ ഇല്ലെങ്കിലും ഇതര സംസ്ഥാന തൊഴിലാളികളുടെയും പ്രവാസികളുടെയും കുട്ടികൾക്ക് പ്രവേശനം നൽകണമെന്ന് വിദ്യാഭ്യാസ വകുപ്പ് നിർദ്ദേശിച്ചു.
സംസ്ഥാന സിലബസിലെ എല്ലാ സർക്കാർ, എയ്ഡഡ്, അംഗീകൃത അൺഎയ്ഡഡ് സ്കൂളുകളിലും മെയ് 2 മുതൽ പ്രവേശനം ആരംഭിക്കും.
രേഖകളില്ലാത്ത കുട്ടികൾക്ക് അവ ലഭിക്കുന്നതുവരെ താൽക്കാലികാടിസ്ഥാനത്തിൽ പ്രവേശനം നൽകും. സ്കൂൾ പ്രവേശനത്തിന് ഒരു തരത്തിലുള്ള പ്രവേശന പരീക്ഷയും നടത്തരുത്.
വിദേശത്തോ മറ്റ് സംസ്ഥാനങ്ങളിലോ ആയതിനാലോ അസുഖം മൂലമോ മറ്റ് കാരണങ്ങളാലോ വാർഷിക പരീക്ഷ എഴുതാൻ കഴിയാത്തവർക്കായി സ്കൂൾ തലത്തിൽ ഒരു പരീക്ഷ നടത്താനും അർഹരായവർക്ക് സ്ഥാനക്കയറ്റം നൽകാനുമുള്ള നടപടികളുമുണ്ട്.