കോഴിക്കോട്: ചെറുവണ്ണൂരിൽ ചുവരെഴുതാനെത്തിയ ദർസ് വിദ്യാർത്ഥികളെ ആക്രമിച്ച സംഭവത്തിൽ സിആർപിഎഫ് ജവാൻ അറസ്റ്റിൽ. ചെറുവണ്ണൂർ സ്വദേശി സന്തോഷ് ചെറാത്താണ് പൊലീസ് പിടിയിലായത്. കേസിലെ മറ്റൊരു പ്രതിയായ സുരേഷ് ഒളിവിലാണ്.
സംഭവത്തിൽ മുഹമ്മദ് ഉനൈസ് (17), മുഹമ്മദ് ശാമിൽ (17) എന്നിവർക്കാണ് പരിക്കേറ്റത്. ചുവരെഴുതുന്നതിനിടെ എത്തിയ പ്രതികൾ ഇവരോട് മോശമായി പെരുമാറുകയും തുടർന്ന് ചെമ്പ് വള ഉപയോഗിച്ച് മർദിക്കുകയും ചെയ്തുവെന്നാണ് വിദ്യാർത്ഥികളുടെ പരാതി. പരിക്കേറ്റ ഇരുവരെയും മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
വീട്ടുകാരുടെ അനുമതിയോടെ ചുവരെഴുതാനെത്തിയതാണെന്ന് വിദ്യാർത്ഥികൾ വ്യക്തമാക്കുന്നു. സംഭവത്തിന് പിന്നാലെ ദർസ് അധ്യാപകർ ഇടപെട്ടെങ്കിലും ആദ്യം പൊലീസ് കേസ് രജിസ്റ്റർ ചെയ്യാൻ വിസമ്മതിച്ചെന്ന ആക്ഷേപവും ഉയർന്നിട്ടുണ്ട്. തുടർന്ന് അധ്യാപകർ നൽകിയ പരാതിയുടെ അടിസ്ഥാനത്തിലാണ് കേസ് രജിസ്റ്റർ ചെയ്ത് പ്രതിയെ അറസ്റ്റ് ചെയ്തത്. ഒളിവിലുള്ള പ്രതിക്കായി തിരച്ചിൽ തുടരുന്നു.