അഹമ്മദാബാദ്: കടുത്ത വിമർശനങ്ങളും വെല്ലുവിളികളും മറികടന്ന് ഇന്ത്യയെ ടി20 ലോകകപ്പിന്റെ കിരീടത്തിലേക്ക് നയിച്ച പരിശീലകൻ ഗൗതം ഗംഭീർ വിജയം മുൻ പരിശീലകരായ രാഹുൽ ദ്രാവിഡിനും വിവിഎസ് ലക്ഷ്മണനും സമർപ്പിച്ചു. ന്യൂസിലൻഡിനെതിരെ 96 റൺസിന്റെ വമ്പൻ ജയത്തോടെ ഇന്ത്യ മൂന്നാം ടി20 ലോകകിരീടം സ്വന്തമാക്കിയതിന് പിന്നാലെയാണ് ഗംഭീറിന്റെ പ്രതികരണം.
ഇന്ത്യൻ ടീമിനെ ഇന്നത്തെ നിലയിൽ എത്തിച്ചതിന് രാഹുൽ ദ്രാവിഡിനോടും യുവതാരങ്ങളെ വളർത്തിയെടുത്തതിന് വിവിഎസ് ലക്ഷ്മണനോടും കടപ്പെട്ടിരിക്കുന്നുവെന്ന് ഗംഭീർ വാർത്താസമ്മേളനത്തിൽ പറഞ്ഞു. ഈ നേട്ടം ഇരുവർക്കും സമർപ്പിക്കുന്നുവെന്നും അദ്ദേഹം വ്യക്തമാക്കി.
ന്യൂസിലൻഡിനോടും ദക്ഷിണാഫ്രിക്കയോടും ടെസ്റ്റ് പരമ്പരകൾ തോറ്റതിന് ശേഷം താൻ കടുത്ത വിമർശനങ്ങൾ നേരിട്ടിരുന്നുവെന്നും അന്ന് ആത്മവിശ്വാസം നൽകിയത് ഐസിസി ചെയർമാൻ ജയ് ഷായാണെന്നും ഗംഭീർ വെളിപ്പെടുത്തി. കൂടാതെ ചീഫ് സെലക്ടർ അജിത് അഗാർക്കറുടെ പിന്തുണയും നിർണായകമായിരുന്നുവെന്ന് അദ്ദേഹം കൂട്ടിച്ചേർത്തു.
വ്യക്തിഗത നേട്ടങ്ങൾക്കുപകരം ടീം വിജയങ്ങളാണ് ആഘോഷിക്കേണ്ടതെന്ന് ഗംഭീർ പറഞ്ഞു. ഭയം കൂടാതെ ധൈര്യത്തോടെ കളിച്ചാൽ മാത്രമേ വലിയ സ്കോറുകൾ സാധ്യമാകൂ. ഫൈനലിൽ ഇന്ത്യ 250 റൺസ് നേടാനായത് ആ സമീപനത്തിന്റെ ഫലമാണെന്നും അദ്ദേഹം വ്യക്തമാക്കി.
ക്യാപ്റ്റൻ സൂര്യകുമാർ യാദവുമായുള്ള ശക്തമായ ബന്ധവും ടീമിന്റെ വിജയത്തിൽ വലിയ പങ്കുവഹിച്ചതായി ഗംഭീർ പറഞ്ഞു. ഇതിനിടെ, 2028 ലോസ്ആഞ്ചലസ് ഒളിമ്പിക്സിൽ സ്വർണം നേടുക എന്നതാണ് ടീമിന്റെ അടുത്ത വലിയ ലക്ഷ്യമെന്ന് സൂര്യകുമാർ യാദവ് വ്യക്തമാക്കി.
India head coach Gautam Gambhir dedicated the T20 World Cup victory to former coaches Rahul Dravid and VVS Laxman after India defeated New Zealand by 96 runs in the final. Gambhir said the team reached its current level due to the foundations laid by Dravid and Laxman. He also revealed that ICC chairman Jay Shah supported him during a difficult period when he faced heavy criticism. Captain Suryakumar Yadav said the team’s next goal is to win gold at the 2028 Los Angeles Olympics.