ന്യൂഡൽഹി: ടോൾപ്ലാസകളിൽ ഉപയോഗിക്കുന്ന ഫാസ്ടാഗ് വാർഷിക പാസ് നിരക്ക് വർധിപ്പിച്ച് ദേശീയപാതാ അതോറിറ്റി. നിലവിലെ 3000 രൂപയിൽ നിന്ന് 3075 രൂപയാക്കി വാർഷിക പാസ് നിരക്ക് ഉയർത്തിയതായി അധികൃതർ അറിയിച്ചു. പുതിയ നിരക്ക് ഏപ്രിൽ 1 മുതൽ പ്രാബല്യത്തിൽ വരും.
രാജ്യത്ത് ഏകദേശം 56 ലക്ഷത്തോളം വാഹന ഉപയോക്താക്കൾ ഫാസ്ടാഗ് വാർഷിക പാസ് ഉപയോഗിക്കുന്നുണ്ട്. ഈ പാസ് ഉപയോഗിച്ച് വർഷത്തിൽ 200 തവണ വരെ ടോൾ ഫീസ് അടയ്ക്കാതെ ടോൾപ്ലാസകൾ കടന്നുപോകാൻ സാധിക്കും എന്നതാണ് പ്രധാന പ്രത്യേകത.
2025 ഓഗസ്റ്റ് 15-നാണ് ദേശീയപാതാ അതോറിറ്റി ഫാസ്ടാഗ് വാർഷിക പാസ് സംവിധാനം അവതരിപ്പിച്ചത്. ദേശീയപാതകളിലും ദേശീയ എക്സ്പ്രസ് വേകളിലുമുള്ള ഏകദേശം 1150 ടോൾപ്ലാസകളിൽ ഈ പാസ് ഉപയോഗിക്കാം. ഹൈവേ ഉപയോക്താക്കൾക്ക് കൂടുതൽ സൗകര്യപ്രദവും ചെലവ് കുറഞ്ഞതുമായ യാത്രാ മാർഗം നൽകുക എന്നതാണ് ഇതിന്റെ ലക്ഷ്യം.
ഫാസ്ടാഗ് വാർഷിക പാസിന്റെ പ്രധാന ഗുണങ്ങൾ—
ഫാസ്ടാഗ് വാർഷിക പാസ് ഉള്ളവർക്ക് ഓരോ തവണയും ടോൾ അടയ്ക്കേണ്ട ബുദ്ധിമുട്ടിൽ നിന്ന് മോചനം ലഭിക്കും. നിരന്തരം റീചാർജ് ചെയ്യേണ്ടതില്ലെന്നും, പൂർണ്ണമായും പണരഹിതവും ഓട്ടോമാറ്റിക് രീതിയിലും ടോൾപ്ലാസകൾ കടന്നുപോകാനാകുമെന്നും ഇതിന്റെ പ്രത്യേകതയാണ്.
ഇതിലൂടെ ടോൾപ്ലാസകളിലെ നീണ്ട ക്യൂകളിൽ കാത്തിരിക്കേണ്ട സാഹചര്യം ഒഴിവാക്കാൻ സാധിക്കും. ദിവസേനയോ പതിവായി ഹൈവേയിൽ യാത്ര ചെയ്യുന്നവർക്ക് വാർഷിക യാത്രാചെലവ് മുൻകൂട്ടി നിശ്ചയിക്കാൻ കഴിയുന്നതും ഒരു പ്രധാന ഗുണമാണ്.
പരിഗണിക്കേണ്ട ചില പരിമിതികൾ—
എന്നാൽ അപൂർവ്വമായി മാത്രം ടോൾപ്ലാസകൾ ഉപയോഗിക്കുന്നവർക്ക് ഈ വാർഷിക പാസ് അത്ര പ്രയോജനകരമാകില്ല. മാസത്തിൽ ഒന്ന് അല്ലെങ്കിൽ രണ്ട് തവണ മാത്രമേ ടോൾ വഴിയാത്രയുണ്ടെങ്കിൽ, 3075 രൂപ ചെലവാക്കുന്നത് സാമ്പത്തികമായി ഗുണകരമാകില്ല.
കൂടാതെ, വാർഷിക പാസ് വാങ്ങിയ ശേഷം പണം തിരികെ ലഭിക്കില്ല. ഒരു വർഷം മാത്രമേ ഇതിന് സാധുതയുള്ളൂ; ഉപയോഗിച്ചാലും ഇല്ലെങ്കിലും ഒരു വർഷം കഴിഞ്ഞാൽ വീണ്ടും പുതുക്കണം.