ശബരിമല ക്ഷേത്രത്തിലെ ശ്രീകോവിൽ കട്ടിളയിൽ നിന്ന് സ്വർണം മോഷ്ടിച്ച കേസിലെ ഒന്നാം പ്രതി ഉണ്ണികൃഷ്ണൻ പോറ്റിക്ക് ജാമ്യം ലഭിച്ചു. തിരുവനന്തപുരം സ്പെഷ്യൽ സബ് ജയിലിൽ കഴിഞ്ഞിരുന്ന ഇദ്ദേഹം വ്യാഴാഴ്ചയാണ് പുറത്തിറങ്ങിയത്. കേസിൽ അന്വേഷണസംഘം കൃത്യസമയത്ത് കുറ്റപത്രം സമർപ്പിക്കാത്തതാണ് പ്രതിക്ക് ജാമ്യം ലഭിക്കാൻ വഴിയൊരുക്കിയത്.
അറസ്റ്റിലായി 90 ദിവസം പിന്നിട്ടിട്ടും കുറ്റപത്രം കോടതിയിൽ സമർപ്പിക്കാൻ പോലീസിന് സാധിച്ചില്ല. ഇതോടെ നിയമപരമായ ആനുകൂല്യം ഉണ്ണികൃഷ്ണൻ പോറ്റിക്ക് ലഭിക്കുകയായിരുന്നു. കൊല്ലം വിജിലൻസ് കോടതിയിൽ രണ്ടുദിവസം നീണ്ട വാദപ്രതിവാദങ്ങൾക്കൊടുവിലാണ് കർശന ഉപാധികളോടെ ജാമ്യം അനുവദിച്ചത്.
ജയിലിൽ നിന്ന് പുറത്തിറങ്ങിയെങ്കിലും ഉണ്ണികൃഷ്ണൻ പോറ്റിയെ കാത്തിരിക്കുന്നത് കേന്ദ്ര ഏജൻസിയായ എൻഫോഴ്സ്മെന്റ് ഡയറക്ടറേറ്റിന്റെ (ED) നടപടികളാണ്. അനധികൃത സ്വത്ത് സമ്പാദനവുമായി ബന്ധപ്പെട്ട് ചോദ്യം ചെയ്യലിന് ഹാജരാകാൻ ഇ.ഡി ഉടൻ സമൻസ് അയക്കും. പോറ്റിയുടെ ഉടമസ്ഥതയിലുള്ള 1.3 കോടി രൂപയുടെ സ്വത്തുവകകൾ ഇ.ഡി നേരത്തെ തന്നെ മരവിപ്പിച്ചിരുന്നു. കവർച്ചാ പണം ഉപയോഗിച്ചാണ് ഈ ആസ്തികൾ ഉണ്ടാക്കിയതെന്നാണ് ഏജൻസിയുടെ പ്രാഥമിക നിഗമനം. ജയിൽ കവാടത്തിൽ ഭാര്യയും അടുത്ത ബന്ധുക്കളും ചേർന്നാണ് ഉണ്ണികൃഷ്ണൻ പോറ്റിയെ സ്വീകരിച്ചത്. കേസിന്റെ തുടരന്വേഷണം ശക്തമാക്കാനാണ് വിജിലൻസിന്റെയും ഇ.ഡിയുടെയും തീരുമാനം.