തിരുവനന്തപുരം: ശബരിമല സ്വര്ണക്കൊള്ളക്കേസിലെ ഒന്നാം പ്രതി ഉണ്ണിക്കൃഷ്ണന് പോറ്റിയുമായുള്ള ചിത്രങ്ങള് പുറത്തെത്തിയതില് പ്രതികരണവുമായി മുന് ദേവസ്വം വകുപ്പ് മന്ത്രി കടകം പള്ളി സുരേന്ദ്രന്.
സ്വര്ണക്കൊള്ളയുമായി ബന്ധപ്പെട്ട വാര്ത്ത വരുന്നതുവരെ ഉണ്ണികൃഷ്ണന് പോറ്റിയേക്കുറിച്ച് താന് മനസ്സിലാക്കിയത് ‘ശരിയായ ഒരു ഭക്തന്’ എന്ന നിലയ്ക്കാണെന്നായിരുന്നു അദ്ദേഹത്തിന്റെ പ്രതികരണം. അതിനപ്പുറമൊന്നും മനസിലാക്കാന് സാധിച്ചിട്ടില്ല. ഒരുവട്ടം ഉണ്ണിക്കൃഷ്ണന് പോറ്റിയുടെ വീട്ടില് പോയി എന്ന് നേരത്തെ പറഞ്ഞത് ഓര്മയില് നിന്നാണ്. ഏഴെട്ടുവര്ഷം മുന്പത്തെ കാര്യമാണ്. ഒരു കുട്ടിക്ക് മൊമന്റോ കൊടുക്കുന്ന ചിത്രമാണ് വന്നിട്ടുളളതെന്നുമായിരുന്നു മന്ത്രിയുടെ പ്രതികരണം.
രണ്ടുതവണയല്ല, നാല്പ്പതുതവണ പോയാലും പോയെന്നു പറയാന് തനിക്കൊരു മടിയുണ്ടാകേണ്ട കാര്യമില്ലെന്നും കടകംപള്ളി കൂട്ടിച്ചേര്ത്തു.