വളർത്തുമൃഗങ്ങളുടെ മാലിന്യം വൃത്തിയാക്കുന്നതിൽ പരാജയപ്പെടുന്ന ഉടമകളെ പിടികൂടുന്നതിനായി നഗരങ്ങളിലും അപ്പാർട്ട്മെന്റ് സമുച്ചയങ്ങളിലും സമൂഹങ്ങളിലും ഡിഎൻഎ പരിശോധന നടത്താനൊരുങ്ങി ന്യൂജേഴ്സി. പൊതുജനാരോഗ്യ പ്രശ്നം പരിഹരിക്കുന്നതിന് വേണ്ടിയാണ് ഇത്. ന്യൂജേഴ്സിയിലെ ‘ഹഡ്സൺ ഹാർബർ’ അപ്പാർട്ട്മെന്റ് അധികൃതരാണ് ഡിഎൻഎ പരിശോധനയുമായി രംഗത്ത് എത്തിയിരിക്കുന്നത്.
ന്യൂയോർക്ക് പോസ്റ്റ് റിപ്പോർട്ട് ചെയ്ത ഈ വാർത്ത ഇപ്പോൾ സമൂഹ മാധ്യമങ്ങളിൽ വലിയ ചർച്ചയാവുകയാണ്. അപ്പാർട്ട്മെന്റിൽ നായകളെ വളർത്തുന്നവർ 200 ഡോളർ (ഏകദേശം 16,500 രൂപ) നൽകി നായയുടെ ഉമിനീർ പരിശോധന ) നടത്തി ഡിഎൻഎ വിവരങ്ങൾ ഡാറ്റാബേസിൽ രജിസ്റ്റർ ചെയ്യണം.
അപ്പാർട്ട്മെന്റ് പരിസരത്ത് നായയുടെ വിസർജ്യം കണ്ടെത്തിയാൽ അത് ഉടൻ തന്നെ ടെന്നസിയിലുള്ള ‘പൂപ്രിന്റ്സ്’ എന്ന ലാബിലേക്ക് അയക്കും. ഡിഎൻഎ ഒത്തുനോക്കി ഉടമയെ കണ്ടെത്തിയാൽ 250 ഡോളർ (ഏകദേശം 21,000 രൂപ) ആണ് ആദ്യത്തെ പിഴ. കുറ്റം ആവർത്തിച്ചാൽ പിഴ 1,000 ഡോളർ (ഏകദേശം 83,000 രൂപ) വരെ ഉയർന്നേക്കാം.
അധികൃതരുടെ ഈ നടപടിയെ ‘പൂപ്പ് പോലീസ്’ എന്നാണ് ചില നായ ഉടമകൾ വിശേഷിപ്പിച്ചത്. അപ്പാർട്ട്മെന്റിൽ ഇതിനോടകം തന്നെ ഒരുപാട് നിയമങ്ങളുണ്ടെന്നും പുതിയ നടപടി അതിരു കടന്നതാണെന്നും അപ്പാർട്ട്മെന്റിലെ ഒരു ഫ്ലാറ്റിന്റെ ഉടമയായ ആഞ്ചലീന ബുഡിജ പറയുന്നു. “പലപ്പോഴും ഇരുട്ടത്താണ് നായ്ക്കളെ പുറത്തിറക്കുന്നത്, അപ്പോൾ വിസർജ്യം കണ്ടെത്താൻ പ്രയാസമായിരിക്കും. ഇത് അല്പം ക്രൂരമാണ്,” അവർ വ്യക്തമാക്കി.
അപ്പാർട്ട്മെന്റ് അധികൃതരുടെ ഡിഎൻഎ പരിശോധനയ്ക്കെതിരെ ഒരു വിഭാഗം ഫ്ലാറ്റ് ഉടമകൾ രംഗത്തെത്തിയെങ്കിലും, ശുചിത്വത്തിന് മുൻഗണന നൽകുന്ന ഭൂരിഭാഗം താമസക്കാരും ഈ തീരുമാനത്തെ കൈയടിച്ചു സ്വാഗതം ചെയ്യുകയാണെന്നും റിപ്പോര്ട്ടുകൾ പറയുന്നു. പൊതുസ്ഥലങ്ങളിൽ നായയുടെ വിസർജ്യം ചവിട്ടേണ്ടി വരുന്നത് വലിയ ദുരിതമാണെന്ന് ഇവർ കൂട്ടിച്ചേർക്കുന്നു.
നായ്ക്കളുടെ വിസർജ്യം ശേഖരിച്ച് ലാബിലേക്ക് അയക്കുന്ന ചുമതലയുള്ള പ്രോപ്പർട്ടി മാനേജർ ക്രിസ്റ്റീന ഒർട്ടീസ് ഈ സാങ്കേതികവിദ്യ വളരെ ഫലപ്രദമാണെന്നാണ് അവകാശപ്പെട്ടത്. തന്റെ ജോലിയെ ഒരു ‘ഡിറ്റക്റ്റീവ്’ ജോലിയോടാണ് അവർ ഉപമിച്ചത്. പരിസരം വൃത്തിയായി സൂക്ഷിക്കാൻ ഈ പദ്ധതിയല്ലാതെ വേറെ വഴിയില്ലെന്നാണ് മാനേജ്മെന്റിന്റെ നിലപാട്.
അതേസമയം വിനോദസഞ്ചാരികൾക്ക് പിഴ ചുമത്തില്ല, തെരുവിൽ നായ്ക്കളുടെ വിസർജ്ജ്യം ഉപേക്ഷിക്കുന്നതിന് ശിക്ഷ ലഭിക്കില്ല എന്നത് അന്യായമാണെന്ന് പല ഉടമകളും പറയുന്നു. തെരുവുകളിലെ കുഴപ്പങ്ങളിൽ ഭൂരിഭാഗവും ഉടമകളില്ലാത്ത തെരുവ് നായ്ക്കളുടെ ഫലമാണെന്ന ആശങ്കയും ഉണ്ട്.