സിനിമകളുടെ പ്രചാരണ പരിപാടികളിൽ നിന്ന് വർഷങ്ങളായി വിട്ടുനിൽക്കുന്ന തമിഴ് സൂപ്പർതാരം അജിത് കുമാർ, ഒരു ശീതളപാനീയത്തിന്റെ (Cola) പരസ്യത്തിൽ പ്രത്യക്ഷപ്പെട്ടത് വലിയ ചർച്ചയാകുന്നു. സ്വന്തം റേസിംഗ് ടീമിനെ സാമ്പത്തികമായി പിന്തുണയ്ക്കുന്നതിന്റെ ഭാഗമായാണ് താരം ഈ പരസ്യ കരാർ ഏറ്റെടുത്തതെന്നാണ് വിവരം. എന്നാൽ, നിലപാടുകളിലെ മാറ്റം ചൂണ്ടിക്കാട്ടി സോഷ്യൽ മീഡിയയിൽ ഒരു വിഭാഗം ആരാധകർ താരത്തിനെതിരെ രംഗത്തെത്തിയിട്ടുണ്ട്.
“നല്ല സിനിമകൾക്ക് പരസ്യം ആവശ്യമില്ല” എന്ന് വിശ്വസിക്കുകയും തന്റെ സിനിമകളുടെ പ്രൊമോഷനുകളിൽ നിന്ന് വിട്ടുനിൽക്കുകയും ചെയ്യുന്ന വ്യക്തിയാണ് അദ്ദേഹം. എന്നാൽ ഒരു ശീതളപാനീയത്തിന് വേണ്ടി അദ്ദേഹം ഈ നയം തിരുത്തിയത് വിമർശകർ ചൂണ്ടിക്കാട്ടുന്നു. കഴിഞ്ഞ ഒരു പതിറ്റാണ്ടിലേറെയായി മാധ്യമങ്ങൾക്ക് അഭിമുഖം നൽകാനോ പരസ്യങ്ങളിൽ അഭിനയിക്കാനോ അജിത് തയ്യാറായിരുന്നില്ല. സിനിമയ്ക്ക് പ്രൊമോഷൻ വേണ്ടെന്ന് പറയുന്ന താരം, ബിസിനസ്സ് താല്പര്യങ്ങൾ വരുമ്പോൾ മറ്റൊരു നിലപാട് സ്വീകരിക്കുന്നത് ഇരട്ടത്താപ്പാണെന്നാണ് സോഷ്യൽ മീഡിയയിലെ സംസാരം.
നിലവിൽ അബുദാബിയിൽ നടക്കുന്ന അന്താരാഷ്ട്ര കാർ റേസിങ് ചാമ്പ്യൻഷിപ്പുകളുടെ തിരക്കിലാണ് അജിത്. തന്റെ ഉടമസ്ഥതയിലുള്ള റേസിംഗ് ടീമിനെ പ്രൊമോട്ട് ചെയ്യുന്നതിനാണ് അദ്ദേഹം ഈ പരസ്യത്തിൽ അഭിനയിച്ചത്. റേസിംഗിനായി സിനിമയിൽ നിന്ന് ഒൻപത് മാസത്തോളം അദ്ദേഹം അവധിയെടുത്തിരുന്നു.
റേസിംഗ് ടൂർണമെന്റുകൾക്ക് ശേഷം ഫെബ്രുവരിയിൽ അജിത് വീണ്ടും സിനിമാ സെറ്റുകളിലേക്ക് മടങ്ങിയെത്തും. അധിക് രവിചന്ദ്രൻ സംവിധാനം ചെയ്യുന്ന പുതിയ ചിത്രത്തിലാണ് അദ്ദേഹം അടുത്തതായി അഭിനയിക്കുന്നത്. ഇരുവരും ഒന്നിച്ച ‘ഗുഡ് ബാഡ് അഗ്ലി’ ആണ് അജിത്തിന്റേതായി പുറത്തിറങ്ങിയ ഏറ്റവും പുതിയ ചിത്രം.