കോഴിക്കോട്: പൊലീസ് ലാത്തിച്ചാര്ജില് പരിക്കേറ്റ് ചികിത്സയിലായിരുന്ന ഷാഫി പറമ്പില് എം.പി ആശുപത്രി വിട്ടു. മൂക്കിന് പരിക്കേറ്റതിനെ തുടര്ന്ന് ബേബി മെമ്മോറിയല് ആശുപത്രിയില് ശസ്ത്രക്രിയ നടത്തിയിരുന്നു. ഇന്നലെ രാത്രിയോടെയാണ് ഡിസ്ചാര്ജ് ആയത്.
വെള്ളിയാഴ്ച രാത്രിയാണ് പേരാമ്പ്രയില് യു.ഡി.എഫ് പ്രകടനത്തിനിടെയുണ്ടായ പൊലീസ് നടപടിയില് ഷാഫിക്ക് പരിക്കേറ്റത്. കോളജ് യൂനിയന് തിരഞ്ഞെടുപ്പുമായി ബന്ധപ്പെട്ട് യു.ഡി.എസ്.എഫ് പ്രവര്ത്തകര്ക്കെതിരെയുണ്ടായ ആക്രമണത്തില് പ്രതിഷേധിച്ച് യു.ഡി.എഫ് നടത്തിയ പ്രകടനത്തിന് നേരെ പൊലീസ് നടത്തിയ ലാത്തിചാര്ജിലും കണ്ണീര്വാതക പ്രയോഗത്തിലും ഷാഫി പറമ്പില് എം.പി ഉള്പ്പെടെ നിരവധി പേര്ക്ക് പരിക്കേറ്റിരുന്നു. തലക്കും മൂക്കിനും പരിക്കേറ്റ ഷാഫിയെ മൂന്നു മണിക്കൂര് നീണ്ടുനിന്ന ശസ്ത്രക്രിയക്ക് വിധേയനാക്കി.