തിരുവനന്തപുരം: വിദ്യാർഥികൾ തമ്മിലുണ്ടായ സംഘർഷത്തിനിടെ കത്തിക്കുത്തേറ്റ് ഒരാൾക്ക് പരിക്ക്. പോത്തൻകോട് കെഎസ്ആർടിസി ബസ്റ്റാൻഡിൽ വെച്ച് നടന്ന സംഘർഷത്തിനിടെയാണ് വിദ്യാർഥിക്ക് കുത്തേറ്റത്. ഇന്നലെ വൈകുന്നേരവും വിദ്യാർഥികൾ തമ്മിൽ സംഘർഷമുണ്ടായിരുന്നു. ഇതിന്റെ തുടർച്ചെന്നവണ്ണമാണ് ഇന്ന് രാവിലെ വീണ്ടും പ്രശ്നമുണ്ടാകുന്നതും സംഭവം കത്തിക്കുത്തിൽ കലാശിച്ചതും.
കുത്തേറ്റ വിദ്യാർഥിയെ ഉടൻ തന്നെ ആശുപത്രിയിൽ പ്രവേശിപ്പിച്ചിട്ടുണ്ട്. വിവരം അറിഞ്ഞ് പോലീസ് സ്ഥലത്തെത്തിയപ്പോഴേക്കും സ്ഥലത്ത് നിന്നും വിദ്യാർഥിയെ ആശുപത്രിയിലേക്ക് മാറ്റിയിരുന്നു. കുത്തേറ്റ വിദ്യാർഥിയെ സംബന്ധിച്ച വിവരങ്ങൾ പുറത്തുവന്നിട്ടില്ല. സംഭവത്തിൽ പോത്തൻകോട് പോലീസ് അന്വേഷണം ആരംഭിച്ചിട്ടുണ്ട്.
തിങ്കളാഴ്ച വൈകുന്നേരം ബസ് സ്റ്റാൻഡിൽ വെച്ച് വിദ്യാർഥികൾ തമ്മിൽ സംഘർഷം ഉണ്ടായിരുന്നു. ഇതിൽ ഉൾപ്പെട്ട വിദ്യാർഥികളെ പോലീസ് പിടികൂടി രക്ഷിതാക്കൾക്കൊപ്പം വിട്ടയച്ചിരുന്നു. ഇതേ വിദ്യാർഥികൾ തമ്മിലാണ് ഇന്ന് വീണ്ടും സംഘർഷമുണ്ടായതെന്നാണ് വിവരം. പോത്തൻകോട് ബസ് സ്റ്റാൻഡിൽ വിദ്യാർഥികൾ തമ്മിൽ സംഘർഷങ്ങൾ പതിവാണെന്നാണ് പോലീസ് പറയുന്നത്.