പത്തനംതിട്ട: കോന്നിയിൽ രോഗിയുമായി ആശുപത്രിയിലേക്ക് പോയ അംബുലൻസിന്റെ വഴിമുടക്കി ബൈക്ക് യാത്രികൻ. കോന്നിയിൽ നിന്ന് പരുമലയിലെ സ്വകാര്യ ആശുപത്രിയിലേക്ക് പോകുകയായിരുന്ന സേവഭാരതിയുടെ ആംബുലൻസിനായിരുന്നു യുവാവ് വഴിമുടക്കിയത്. ആറാപുഴ റോഡിൽ രണ്ടരകിലോമീറ്ററിലധികം ബൈക്ക് യാത്രികൻ ഇത്തരത്തിൽ ആംബുലൻസിന്റെ വഴിമുടക്കി.
ബൈക്കിനെ മറികടന്ന് പോകാൻ ശ്രമിക്കുന്ന ആംബുലൻസിനെ മുന്നോട്ട് പോകാൻ അനുവദിക്കാതെ തടസം സൃഷ്ടിക്കുന്ന ബൈക്ക് യാത്രികന്റെ ദൃശ്യങ്ങൾ പുറത്തുവന്നിട്ടുണ്ട്. ആംബുലൻസിലുണ്ടായിരുന്നവരാണ് ഈ വീഡിയോ ചിത്രീകരിച്ചത്. സംഭവത്തിൽ പോലീസും മോട്ടോർ വാഹന വകുപ്പും അന്വേഷണം ആരംഭിച്ചിട്ടുണ്ട്. ബൈക്കിന്റെ നമ്പർ പ്ലേറ്റ് കേന്ദ്രീകരിച്ച് അന്വേഷണം പുരോഗമിക്കുകയാണ്.