ന്യൂയോർക്ക്: യുഎസിൽ ഇന്ത്യൻ വംശജരായ നാലംഗ കുടുംബത്തെ കാണാതായി. ആശാ ദിവാൻ (85), കിഷോർ ദിവാൻ (89), ശൈലേഷ് ദിവാൻ (86), ഗീതാ ദിവാൻ (84) എന്നിവരെയാണ് കാണാതായത്. വെസ്റ്റ് വിർജീനിയയിലെ ആത്മീയ കേന്ദ്രത്തിലേക്കുള്ള യാത്രയ്ക്കിടെയാണ് ഇവരെ കാണാതായതെന്ന് പൊലീസ് അറിയിച്ചു. ജൂലൈ 29-ന് പെൻസിൽവാനിയയിലെ ബർഗർ ഷോപ്പിലാണ് ഇവരെ അവസാനമായി കണ്ടത്.
കുടുംബം പിറ്റ്സ്ബർഗിലേക്കും അവിടെ നിന്ന് വെസ്റ്റ് വിർജീനിയയിലെ മൗണ്ട്സ്വില്ലേയിലേക്കും പോവുകയായിരുന്നുവെന്ന് മാർഷൽ കൗണ്ടി ഷെരീഫ് മൈക്ക് ഡൗഗെർട്ടി പറഞ്ഞു. ഇകെഡബ്ല്യു2611 ടൊയോട്ട കാറിലാണ് ഇവർ വെസ്റ്റ് വിർജീനിയയിലെ മാർഷൽ കൗണ്ടിയിലുള്ള പ്രഭുപാദ പാലസ് ഓഫ് ഗോൾഡിലേക്ക് യാത്ര തിരിച്ചത്.
ബർഗർ കടയിലെ നിരീക്ഷണ ക്യാമറകളിൽ, നാലംഗ സംഘത്തിലെ രണ്ടു പേർ റെസ്റ്റോറന്റിലേക്ക് കയറുന്നതിന്റെ ദൃശ്യം പതിഞ്ഞിട്ടുണ്ട്. ഇവരുടെ അവസാനത്തെ ക്രെഡിറ്റ് കാർഡ് ഇടപാടും ഇതേ സ്ഥലത്താണ് നടന്നത്.