തൃശ്ശൂര്: തൃശ്ശൂര് കോര്പ്പറേഷന് കൗണ്സില് ഹാളിലെ യോഗത്തിനിടെ തലയിലും ദേഹത്തും ചുവന്നമഷിയൊഴിച്ച് ഡെസ്കില് കയറി മുദ്രാവാക്യം വിളിച്ച പ്രതിപക്ഷ കൗണ്സിലര്മാര്ക്ക് കൂട്ട സസ്പെന്ഷന്. നഗരമധ്യത്തിലെ എം.ജി. റോഡിലെ കുഴിയില് ചാടാതിരിക്കാന് വെട്ടിച്ച ബൈക്കില് ബസ്സിടിച്ച് യുവാവ് മരിച്ച സംഭവത്തില് നടപടി ആവശ്യപ്പെട്ടാണ് വേറിട്ട പ്രതിഷേധം അരങ്ങേറിയത്. പ്രതിഷേധത്തിന് നേതൃത്വംനല്കിയ പ്രതിപക്ഷ കക്ഷി നേതാവ് രാജന് ജെ. പല്ലന് രാജിവെയ്ക്കണമെന്ന് ഭരണപക്ഷം ആവശ്യപ്പെട്ടു.
ഇതിനിടെ ഡെസ്കില് കയറിയ ആളെ മേയര് സസ്പെന്ഡ് ചെയ്തതായി പ്രഖ്യാപിച്ചു. ഇത് കേട്ടയുടന് കുറച്ചുപേര്ക്കൂടി ഡെസ്കില് കയറി. അതോടെ 10 പേരെക്കൂടി സസ്പെന്ഡ് ചെയ്തു. പിന്നാലെ ബാക്കി പ്രതിപക്ഷ കൗണ്സിലര്മാരും ഡെസ്ക്കില് കയറുകയായിരുന്നു. പ്രതിപക്ഷ കൗണ്സിലര്മാരില് ഭൂരിപക്ഷംപേരെയും അടുത്ത മൂന്ന് കൗണ്സില് യോഗങ്ങളില്നിന്ന് സസ്പെന്ഡ് ചെയ്തിട്ടുണ്ട്.