പ്രശസ്ത പോളോ താരം സഞ്ജയ് കപൂർ അന്തരിച്ചു. ബോളിവുഡ് നടി കരിഷ്മ കപൂറിന്റെ മുൻ ഭർത്താവാണ് അമ്പത്തിമൂന്നുകാരനായ സഞ്ജയ് കപൂർ. ഇന്നലെ ഇംഗ്ലണ്ടിലെ ഗാർഡ്സ് പോളോ ക്ലബിൽ മത്സരത്തിനിടെയാണ് സംഭവം. പോളോ കളിക്കുന്നതിനിടെ ഒരു പ്രാണി തൊണ്ടയിൽ കുടുങ്ങിയതിനെ തുടർന്ന് ശ്വാസതടസവും പിന്നാലെ ഹൃദയാഘാതവും സംഭവിക്കുകയായിരുന്നു.
മത്സരത്തിനിടെ ശ്വാസംമുട്ടലും ദേഹാസ്വാസ്ഥ്യവും അനുഭവപ്പെട്ടതോടെ സഞ്ജയ് മത്സരം നിർത്തിവക്കാൻ ആവശ്യപ്പെട്ടു. തുടർന്ന് ഗ്രൗണ്ടിന് പുറത്തിറങ്ങിയ ഉടൻ ഹൃദയാഘാതമുണ്ടായി. അറിയപ്പെടുന്ന ബിസിനസുകാരൻ കൂടിയാണ് സഞ്ജയ്. ‘ഓറിയസ്’എന്ന പോളോ ടീമിന്റെ ഉടമയാണ് സഞ്ജയ് കപൂർ.
കരിഷ്മ കപൂറിനും സഞ്ജയ്ക്കും സമൈറ, കിയാൻ എന്നീ രണ്ട് മക്കളുമുണ്ട്. കരിഷ്മയുമായുള്ള വിവാഹബന്ധം വേർപിരിഞ്ഞ ശേഷം സഞ്ജയ് പ്രിയ സച്ച്ദേവിനെ വിവാഹം കഴിച്ചിരുന്നു. ഗുരുഗ്രാം ആസ്ഥാനമായ മൊബിലിറ്റി ടെക്നോളജി കമ്പനി സോന കോംസ്റ്റാറിന്റെ ചെയർമാൻ കൂടിയായ സഞ്ജയ്, ഡൂൺ സ്കൂൾ പൂർവവിദ്യാർഥിയാണ്.