കൊച്ചി: നടിയെ ആക്രമിച്ച കേസില് ഒന്നാം പ്രതി പള്സര് സുനി സ്വകാര്യ മാധ്യമത്തോട് നടത്തിയ വെളിപ്പെടുത്തല് പരിശോധിക്കാന് ക്രൈംബ്രാഞ്ച് ഒരുങ്ങുന്നതായി റിപ്പോർട്ട്. തുടര് നടപടിക്കുള്ള സാധ്യതകളാണ് പരിശോധിക്കുക എന്നാണ് ലഭിക്കുന്ന വിവരം.
വിഷയത്തിൽ നിയമോപദേശം തേടാനും ക്രൈംബ്രാഞ്ച് തീരുമാനിച്ചിട്ടുണ്ട് എന്നാണ് ലഭിക്കുന്ന വിവരം. ഡിവൈഎസ്പി ബൈജു പൗലോസിന്റെ നേതൃത്വത്തിലുള്ള അന്വേഷണസംഘം ഉടന് യോഗം ചേരും എന്നാണ് അടുത്ത വൃത്തങ്ങളിൽ നിന്നും പുറത്തു വരുന്ന വിവരം.
കഴിഞ്ഞ ദിവസമാണ് നടിയെ ആക്രമിച്ച കേസുമായി ബന്ധപ്പെട്ട പള്സര് സുനിയുടെ വെളിപ്പെടുത്തല് റിപ്പോര്ട്ടര് പുറത്തുവിട്ടത്. ഒളിക്യാമറയിലൂടെയായിരുന്നു പള്സര് സുനിയുടെ വെളിപ്പെടുത്തല്. നടിയെ ബലാത്സംഗം ചെയ്യാന് ഒന്നരക്കോടി രൂപയാണ് തനിക്ക് ദിലീപ് പ്രതിഫലമായി വാഗ്ദാനം ചെയ്തതെന്ന് പള്സര് സുനി പറയുന്നത് ഒളിക്യാമറയില് വ്യക്തമായിരുന്നു.