കൊച്ചി: കൊച്ചിയിൽ വിജയകരമായി പ്രവർത്തിക്കുന്ന വാട്ടർ മെട്രോ പദ്ധതി തെക്കൻ കേരളത്തിലേക്കും വ്യാപിപ്പിക്കാൻ നടപടികൾ വേഗത്തിലാകുന്നു. ആലപ്പുഴയിലെയും കൊല്ലത്തെയും ജലപാതകളെ ബന്ധിപ്പിക്കുന്ന പദ്ധതിക്കായുള്ള സാധ്യതാപഠനവും വിശദമായ റിപ്പോർട്ടും കൊച്ചി മെട്രോ റെയിൽ ലിമിറ്റഡ് (KMRL) ഇൻലാൻഡ് വാട്ടർവേയ്സ് അതോറിറ്റി ഓഫ് ഇന്ത്യക്ക് (IWAI) കൈമാറി.
അഷ്ടമുടി കായൽ, ടി.എസ്. കനാൽ, കുട്ടനാടൻ ജലപാതകൾ എന്നിവ കേന്ദ്രീകരിച്ചാണ് പദ്ധതി നടപ്പാക്കുക. സൗരോർജ്ജത്തിൽ പ്രവർത്തിക്കുന്ന ചാർജിങ് ഡോക്കുകളും അത്യാധുനിക ഇലക്ട്രിക് ബോട്ടുകളും ഉൾപ്പെടുന്ന പരിസ്ഥിതി സൗഹൃദ സാങ്കേതികവിദ്യയാണ് ഉപയോഗിക്കുക. ആലപ്പുഴയിലും കൊല്ലത്തും പുതിയ ബോട്ട് ടെർമിനലുകളും നിർമ്മിക്കും.
2031-ഓടെ സർവീസുകൾ പൂർണമായും സോളാർ പവർ സ്റ്റേഷനുകളിൽ ചാർജ് ചെയ്യുന്ന ബോട്ടുകളിലേക്ക് മാറ്റുകയാണ് ലക്ഷ്യം. യാത്രക്കാരുടെ ഗതാഗതത്തിനൊപ്പം ജലമാർഗ ചരക്കുനീക്കവും ശക്തിപ്പെടുത്തുന്നതിലൂടെ റോഡുകളിലെ ഗതാഗതക്കുരുക്ക് കുറയ്ക്കാനാകുമെന്നാണ് വിലയിരുത്തൽ.
പദ്ധതി യാഥാർഥ്യമാകുന്നതോടെ ആലപ്പുഴയിലെ ഹൗസ്ബോട്ട് ടൂറിസത്തിനും കൊല്ലത്തെ അഷ്ടമുടി കായൽ മേഖലയിലെ വിനോദസഞ്ചാരത്തിനും വലിയ ഉണർവ് ലഭിക്കുമെന്നാണ് പ്രതീക്ഷ. മൺറോ തുരുത്ത് ഉൾപ്പെടെയുള്ള പ്രധാന വിനോദസഞ്ചാര കേന്ദ്രങ്ങളിലേക്ക് കൂടുതൽ മികച്ച ജലഗതാഗത സൗകര്യവും ലഭ്യമാകും. പുതിയ ടെർമിനലുകൾ വരുന്ന പ്രദേശങ്ങളിലെ റിയൽ എസ്റ്റേറ്റ് മേഖലയിലും ആവശ്യകത വർധിക്കുന്നതായി റിപ്പോർട്ടുകൾ സൂചിപ്പിക്കുന്നു.
2023 ഏപ്രിലിൽ സർവീസ് ആരംഭിച്ച കൊച്ചി വാട്ടർ മെട്രോയിൽ ഇതുവരെ 65 ലക്ഷത്തിലധികം യാത്രക്കാരാണ് യാത്ര ചെയ്തത്. പ്രവർത്തനച്ചെലവ് പൂർണമായി മറികടന്നിട്ടില്ലെങ്കിലും നഷ്ടം ഗണ്യമായി കുറയ്ക്കാനും വരുമാനം വർധിപ്പിക്കാനും പദ്ധതിക്ക് കഴിഞ്ഞിട്ടുണ്ട്. നിലവിൽ പ്രതിദിനം ശരാശരി 7,000 യാത്രക്കാരാണ് സേവനം ഉപയോഗിക്കുന്നത്. ഈ എണ്ണം 8,000 കടന്നാൽ പദ്ധതി ‘ബ്രേക്ക് ഈവൻ’ നിലയിലെത്തുമെന്നാണ് അധികൃതരുടെ കണക്ക്.
English Summary:
The Kochi Water Metro is set to expand to Alappuzha and Kollam as preparations for the new phase gather pace. The project will use solar-powered electric boats and green technology, aiming to improve passenger transport, cargo movement, tourism, and regional connectivity while reducing road congestion.
Slug:
kochi-water-metro-expansion-alappuzha-kollam
Tags: