ഇന്ത്യൻ കയറ്റുമതി മേഖലയ്ക്ക് വലിയ ആശ്വാസമായി യൂറോപ്യൻ യൂണിയന്റെ പുതിയ തീരുമാനം. 2026 സെപ്റ്റംബർ കഴിഞ്ഞും ഇന്ത്യയിൽ നിന്നുള്ള മത്സ്യം, മാംസം, മുട്ട, തേൻ ഉൾപ്പെടെയുള്ള മൃഗജന്യ ഉൽപ്പന്നങ്ങൾ യൂറോപ്യൻ രാജ്യങ്ങളിലേക്ക് കയറ്റുമതി ചെയ്യാൻ അനുമതി തുടരും.
EU കൊണ്ടുവരുന്ന പുതുക്കിയ ഭക്ഷ്യസുരക്ഷാ മാനദണ്ഡങ്ങൾ പാലിക്കുന്ന രാജ്യങ്ങളുടെ പട്ടികയിൽ ഇന്ത്യയെ ഉൾപ്പെടുത്തിയതോടെയാണ് ഈ അനുമതി ഉറപ്പായത്. ഇതോടെ യൂറോപ്യൻ യൂണിയനിലെ 27 രാജ്യങ്ങളിലേക്കുള്ള കയറ്റുമതി തടസമില്ലാതെ തുടരാൻ സാധ്യതയുണ്ട്.
പുതിയ നിയമങ്ങൾ പ്രകാരം ഭക്ഷ്യസുരക്ഷ, ഗുണനിലവാരം, ആന്റിബയോട്ടിക് ഉപയോഗ നിയന്ത്രണം തുടങ്ങിയ വിഷയങ്ങളിൽ കൂടുതൽ കർശന പരിശോധനകൾ ഉണ്ടാകും. ഇതിന് അനുസൃതമായി ഇന്ത്യയിലെ EIC, MPEDA തുടങ്ങിയ ഏജൻസികൾ പരിശോധനാ സംവിധാനങ്ങൾ ശക്തമാക്കും.
ഈ തീരുമാനം ഇന്ത്യയുടെ സമുദ്രോൽപ്പന്ന കയറ്റുമതി മേഖലയ്ക്ക് വലിയ നേട്ടമായി വിലയിരുത്തപ്പെടുന്നു. പ്രത്യേകിച്ച് മത്സ്യത്തൊഴിലാളികൾക്കും കയറ്റുമതി കമ്പനികൾക്കും ഇത് വലിയ ആശ്വാസമാണ്.