Tim Davidക്ക് Indian Premier League അധികൃതർ പിഴ ശിക്ഷ ചുമത്തി. Royal Challengers Bengaluru–Mumbai Indians മത്സരത്തിന് പിന്നാലെ ഡഗൗട്ടിൽ നിന്ന് താരം അശ്ലീല ആംഗ്യം കാണിച്ചതാണ് നടപടിക്ക് കാരണം.
റായ്പൂരിൽ നടന്ന ആവേശകരമായ മത്സരത്തിൽ അവസാന പന്തിലായിരുന്നു ആർസിബിയുടെ വിജയം. വിജയാഘോഷത്തിനിടെ ഡഗൗട്ടിൽ നിന്നിരുന്ന ടിം ഡേവിഡ് നടുവിരൽ ഉയർത്തി ആംഗ്യം കാണിക്കുന്ന ദൃശ്യങ്ങൾ ക്യാമറയിൽ പതിഞ്ഞു. സംഭവം സമൂഹമാധ്യമങ്ങളിൽ വ്യാപകമായി പ്രചരിക്കുകയും വിവാദമാകുകയും ചെയ്തു.
പെരുമാറ്റച്ചട്ടത്തിലെ ആർട്ടിക്കിൾ 2.6 പ്രകാരം “അശ്ലീലമോ അപകീർത്തികരമോ ആയ ആംഗ്യങ്ങൾ” കാണിച്ചതിനാണ് നടപടി. താരത്തിന് മാച്ച് ഫീസിന്റെ 30 ശതമാനം പിഴയായി വിധിച്ചു. ശിക്ഷ ടിം ഡേവിഡ് അംഗീകരിച്ചതായും അധികൃതർ അറിയിച്ചു.
വിജയാഘോഷത്തിനിടെ സഹതാരങ്ങൾ അതിശയത്തോടെ പ്രതികരിക്കുന്ന ദൃശ്യങ്ങളും പുറത്തുവന്നിട്ടുണ്ട്. മത്സരശേഷം സാമൂഹ്യമാധ്യമങ്ങളിൽ വൈറലായ വിഡിയോയാണ് സംഭവത്തെ കൂടുതൽ വിവാദത്തിലാക്കിയത്.