മുംബൈ: തണ്ണിമത്തൻ കഴിച്ചതിന് പിന്നാലെ മുംബൈയിൽ ഒരു കുടുംബത്തിലെ നാല് പേർ മരിച്ച സംഭവം ഭക്ഷ്യവിഷബാധ മൂലമല്ലെന്ന് ഫോറൻസിക് റിപ്പോർട്ട്. തണ്ണിമത്തനിൽ കലർന്ന എലിവിഷമാണ് മരണകാരണമെന്ന് അന്വേഷണസംഘം വ്യക്തമാക്കുന്നു.
മരിച്ചവരുടെ ശരീരത്തിലും അവർ കഴിച്ച തണ്ണിമത്തന്റെ അവശിഷ്ടങ്ങളിലുമാണ് എലിയെ കൊല്ലാൻ ഉപയോഗിക്കുന്ന സിങ്ക് ഫോസ്ഫൈഡ് എന്ന വിഷപദാർഥത്തിന്റെ സാന്നിധ്യം കണ്ടെത്തിയത്.
ഏപ്രിൽ 25നായിരുന്നു സംഭവം. അബ്ദുള്ള ദൊകാഡിയ (45), ഭാര്യ നസ്രീൻ (35), മക്കളായ സൈനബ് (13), ആയിഷ (16) എന്നിവരാണ് മരിച്ചത്. ബന്ധുക്കൾക്കായി വീട്ടിൽ വിരുന്നൊരുക്കിയ ശേഷം രാത്രി ഒരു മണിയോടെ കുടുംബം തണ്ണിമത്തൻ കഴിക്കുകയായിരുന്നു.
തുടർന്ന് പുലർച്ചെ എല്ലാവർക്കും ശക്തമായ ഛർദ്ദിയും വയറിളക്കവും അനുഭവപ്പെട്ടു. ആദ്യം കുടുംബ ഡോക്ടറെ കാണിച്ചെങ്കിലും പിന്നീട് സമീപത്തെ ആശുപത്രിയിലേക്ക് മാറ്റി. ചികിത്സയ്ക്കിടെ നാലുപേരും മരിച്ചു.
പോസ്റ്റ്മോർട്ടത്തിൽ തലച്ചോർ, ഹൃദയം, കുടൽ തുടങ്ങിയ ആന്തരികാവയവങ്ങളിൽ അസാധാരണമായ പച്ചനിറം കണ്ടെത്തിയതോടെയാണ് വിഷബാധ സംശയം ശക്തമായത്. തുടർന്ന് നടത്തിയ വിശദമായ ഫോറൻസിക് പരിശോധനയിലാണ് സിങ്ക് ഫോസ്ഫൈഡിന്റെ സാന്നിധ്യം സ്ഥിരീകരിച്ചത്.
അതേസമയം, വിരുന്നിൽ പങ്കെടുത്ത മറ്റ് ബന്ധുക്കൾക്ക് ആരോഗ്യപ്രശ്നങ്ങൾ ഒന്നും ഉണ്ടായിരുന്നില്ല. ഇതോടെ വിഷം അബദ്ധത്തിൽ പഴത്തിൽ കലർന്നതാണോ, അതോ മനഃപൂർവം ചേർത്തതാണോ എന്നതടക്കമുള്ള കാര്യങ്ങൾ പൊലീസ് പരിശോധിക്കുകയാണ്.
അബ്ദുള്ള ദൊകാഡിയയുടെ ശരീരത്തിൽ മോർഫിൻ സാന്നിധ്യവും കണ്ടെത്തിയിട്ടുണ്ട്. ഇത് ചികിത്സയുടെ ഭാഗമായിരുന്നോ, കേസുമായി ബന്ധമുണ്ടോയെന്നതും അന്വേഷണ പരിധിയിലുണ്ട്.
സംഭവത്തിൽ അസ്വാഭാവിക മരണത്തിന് കേസ് രജിസ്റ്റർ ചെയ്ത പൊലീസ് കുടുംബാംഗങ്ങളുടെയും ബന്ധുക്കളുടെയും മൊഴി ശേഖരിച്ച് അന്വേഷണം വ്യാപിപ്പിച്ചു.
English Summary
Forensic reports revealed that rat poison mixed in watermelon caused the death of a four-member family in Mumbai, ruling out ordinary food poisoning. Police are investigating whether the poison was accidental or intentional.