കണ്ണൂർ: പേരാവൂരിലെ തെരഞ്ഞെടുപ്പ് തോൽവിയെ തുടർന്ന് സിപിഐഎമ്മിൽ ആഭ്യന്തര അതൃപ്തി ഉയരുന്നു. മത്സരിച്ച തീരുമാനത്തിനെതിരെ കെ കെ ശൈലജ സംസ്ഥാന സെക്രട്ടറിയേറ്റിൽ കടുത്ത വിമർശനം ഉന്നയിച്ചതായാണ് റിപ്പോർട്ട്.
മത്സരിക്കാൻ താൽപര്യമില്ലാതിരുന്നിട്ടും നിർബന്ധിച്ച് സ്ഥാനാർത്ഥിയാക്കിയതാണെന്നും, ജയസാധ്യത കുറവാണെന്ന് എല്ലാവർക്കും മുൻകൂട്ടി അറിയാമായിരുന്നുവെന്നും കെ കെ ശൈലജ യോഗത്തിൽ അഭിപ്രായപ്പെട്ടതായി ആണ് ലഭിക്കുന്ന വിവരം.
മുൻ തെരഞ്ഞെടുപ്പിൽ മട്ടന്നൂരിൽ നിന്ന് വൻ ഭൂരിപക്ഷത്തോടെ വിജയിച്ച ശൈലജയ്ക്ക് ഈ തവണ പേരാവൂരിൽ പ്രതീക്ഷിച്ച പിന്തുണ ലഭിക്കാതെ പോയി. പല സിപിഐഎം ശക്തികേന്ദ്രങ്ങളിലും വോട്ട് ചോർച്ച ഉണ്ടായതായും വിലയിരുത്തപ്പെടുന്നു.
അതേസമയം, യുഡിഎഫ് സ്ഥാനാർത്ഥി സണ്ണി ജോസഫ് നിരവധി ബൂത്തുകളിൽ ലീഡ് നേടിയതും നഗരസഭ ഉൾപ്പെടെയുള്ള മേഖലകളിൽ മുന്നേറ്റം ഉണ്ടാക്കിയതും സിപിഐഎമ്മിന് തിരിച്ചടിയായി. തോൽവിയുടെ കാരണങ്ങൾ വിശദമായി പരിശോധിക്കുമെന്ന് പാർട്ടി നേതൃത്വം വ്യക്തമാക്കിയിട്ടുണ്ട്.