കണ്ണൂര്: സിഎംആര്എല്- എക്സാലോജിക് സാമ്പത്തിക ഇടപാട് കേസില് പിണറായി വിജയന്റെ വീടുകളില് ഉള്പ്പെടെ നടക്കുന്ന ഇ ഡി പരിശോധനയില് വ്യാപക പ്രതിഷേധവുമായി സിപിഐഎം.
കണ്ണൂരിലെ പിണറായി വിജയന്റെ വീട്ടില് ഇ ഡി ഉദ്യോഗസ്ഥര് രാവിലെ ആറുമണിയോടെയാണ് പരിശോധനയ്ക്ക് എത്തിയത്.
വീട്ടില് ആരുമില്ലാത്തതിനാല് പരിശോധന വൈകി. ഏഴുമണിക്ക് മുന്പായി പരിശോധന ആരംഭിച്ചു. വീട്ടിനകത്ത് കെയര് ടേക്കറും പിണറായി ലോക്കല് സെക്രട്ടറിയുമാണ് ഉണ്ടായിരുന്നത്. ഇവരാണ് വീട് തുറന്ന് നല്കിയത്. വിവരം പുറത്തുവന്നതോടെ പാര്ട്ടി പ്രവര്ത്തകര് സ്ഥലത്ത് തമ്പടിച്ചു.
ലോക്കല് പൊലീസും സ്ഥലത്തെത്തി. ഇ ഡി റെയ്ഡ് പ്രതികാര രാഷ്ട്രീയ വേട്ടയാടലാണെന്ന് സിപിഐഎം ജില്ലാ കമ്മിറ്റി അംഗം എം കെ മുരളി പറഞ്ഞു. വിഷയത്തെ രാഷ്ട്രീയമായും നിയമപരമായും നേരിടുമെന്നും എം കെ മുരളി പറഞ്ഞു.
അതേസമയം റെയ്ഡിന് പിന്നാലെ ഏതുതരത്തിലാണ് പ്രതിഷേധം വേണ്ടതെന്ന് തീരുമാനിക്കാന് അടിയന്തര സംസ്ഥാന സെക്രട്ടറിയേറ്റ് യോഗം വിളിച്ചിട്ടുണ്ട്. ഇന്ന് രാവിലെ ഓണ്ലൈനായാണ് യോഗം ചേരുക. തിരുവനന്തപുരത്തുളള സംസ്ഥാന സെക്രട്ടറിയേറ്റ് അംഗങ്ങള് എകെജി സെന്ററിലെത്തും. മറ്റ് പ്രധാന നേതാക്കളോടും യോഗത്തില് പങ്കെടുക്കാന് നിര്ദേശിച്ചിട്ടുണ്ട്. പിണറായിയില് പ്രകടനം നടത്താനാണ് തീരുമാനം.