കണ്ണൂർ: പാനൂരിൽ വീണ്ടും സ്റ്റീൽ ബോംബുകൾ കണ്ടെത്തിയ സംഭവം ആശങ്ക ഉയർത്തുന്നു. പന്ന്യന്നൂർ ചിത്രവയലിൽ നിന്നാണ് രണ്ട് സ്റ്റീൽ ബോംബും ഒരു നാടൻ കെട്ട് ബോംബും കണ്ടെത്തിയത്.
രഹസ്യ വിവരത്തെ തുടർന്ന് പൊലീസും ബോംബ് സ്ക്വാഡും ചേർന്ന് നടത്തിയ പരിശോധനയിലാണ് ഒഴിഞ്ഞ പറമ്പിൽ നിന്ന് ബോംബുകൾ കണ്ടെത്തിയത്. കേരള പൊലീസ് ഉദ്യോഗസ്ഥരും എസിപി ഉൾപ്പെടെയുള്ളവരും സ്ഥലത്തെത്തി പരിശോധന തുടരുകയാണ്. ബോംബുകൾ ഉടൻ നിർവീര്യമാക്കുമെന്ന് അധികൃതർ അറിയിച്ചു.
അതേസമയം, കഴിഞ്ഞ ദിവസം വടകരയിൽ നിന്നും മൂന്ന് സ്റ്റീൽ ബോംബുകൾ കണ്ടെത്തിയിരുന്നു. ചാനിയം കടവിന് സമീപം റോഡിന് കുറുകെയുള്ള ചാലിൽ നിന്നാണ് ബോംബുകൾ കണ്ടെത്തിയത്. പിന്നീട് അവ നിർവീര്യമാക്കിയിരുന്നു.