കൊച്ചി: സിനിമാപ്രേമികൾക്കായി വീണ്ടും ഒരു അന്താരാഷ്ട്ര ചലച്ചിത്ര വിരുന്ന് ഒരുങ്ങുന്നു. LK ഇന്റർനാഷണൽ ഷോർട് ഫിലിം ഫെസ്റ്റിവലിന്റെ രണ്ടാം പതിപ്പ് ഏപ്രിൽ 28-ന് കൊച്ചിയിലെ ഗോകുലം കൺവെൻഷണൽ സെന്ററിൽ നടക്കും.
ഈ വർഷത്തെ ഫെസ്റ്റിവലിന്റെ ക്രിയേറ്റീവ് ഡയറക്ടറായി വൈബ് ഓൺ ഗ്ലോബൽ ഗ്രൂപ്പ് ചെയർമാനും പാൻ-ഇന്ത്യൻ നടനുമായ വിയാൻ മംഗലശ്ശേരി ചുമതലയേറ്റിട്ടുണ്ട്. ഹൈദരാബാദ് രാമോജി ഫിലിം സിറ്റിയിൽ നടന്ന ഇൻഡിവുഡ് ഇന്റർനാഷണൽ ഫിലിം കാർണിവലിന്റെ ചീഫ് ഓർഗനൈസറായിരുന്ന വിയാന്റെ നേതൃത്വത്തിൽ, കലയും സാങ്കേതികവിദ്യയും ഏകോപിപ്പിക്കുന്ന പുതിയ തലമുറ ചലച്ചിത്ര അനുഭവം പ്രേക്ഷകർക്ക് സമ്മാനിക്കാനാണ് സംഘാടകർ ലക്ഷ്യമിടുന്നത്.
ആറ് പ്രധാന വിഭാഗങ്ങളിലായി ഇന്ത്യയിലും വിദേശത്തുനിന്നുമായി ലഭിച്ച 1200-ത്തിലധികം ചിത്രങ്ങളിൽ നിന്ന്, 16 അംഗ അന്താരാഷ്ട്ര ജൂറി സംഘം തിരഞ്ഞെടുത്ത മികച്ച ചിത്രങ്ങൾക്കാണ് പുരസ്കാരങ്ങൾ നൽകുക. വിജയികൾക്ക് ലക്ഷക്കണക്കിന് രൂപയുടെ സമ്മാനങ്ങളും വിവിധ അംഗീകാരങ്ങളും ലഭിക്കും.