കോട്ടയം വേമ്പിൻകുളങ്ങര ശ്രീ മഹാവിഷ്ണു ക്ഷേത്രോത്സവത്തിനിടെ ക്രിസ്തീയ ഭക്തിഗാനം ആലപിച്ച ഭജന സംഘത്തിനെതിരെ രൂക്ഷവിമർശനവുമായി ഹിന്ദു ഐക്യവേദി മുഖ്യരക്ഷാധികാരി കെ.പി. ശശികല.
‘നന്ദഗോവിന്ദം ഭജൻസ്’ അവതരിപ്പിച്ച പരിപാടിയിൽ ‘ഈ പരദേവനഹോ’ എന്ന ഗാനം ഉൾപ്പെടുത്തിയതാണ് വിവാദമായത്. സോഷ്യൽ മീഡിയയിൽ ഒരു വിഭാഗം ഇവരെ പ്രശംസിച്ചെങ്കിലും, ക്ഷേത്ര ആചാരങ്ങൾക്ക് നിരക്കാത്ത നടപടിയാണിതെന്ന് ശശികല ഫേസ്ബുക്ക് പോസ്റ്റിലൂടെ വ്യക്തമാക്കി.
“ഇരിക്കുന്ന കൊമ്പ് എത്ര ബലമുള്ളതാണെങ്കിലും സ്വയം മുറിച്ചാൽ അത് മുറിയാതിരിക്കില്ല” എന്ന് ശശികല കുറിച്ചു. “ചിക്കൻ മസാല നല്ലതാണ്, പക്ഷേ അത് പായസത്തിൽ ഇടരുത്” എന്ന വിചിത്രമായ ഉപമയിലൂടെയാണ് ക്ഷേത്രമുറ്റത്തെ ഭജനയിൽ മറ്റ് മതസ്ഥരുടെ ഗാനങ്ങൾ ഉൾപ്പെടുത്തുന്നതിനെ അവർ വിമർശിച്ചത്.
ഒരു സാധാരണ വീട്ടമ്മയുടെ ഉപദേശമായി ഇതിനെ കാണണമെന്നും അവർ കൂട്ടിച്ചേർത്തു.ക്ഷേത്രങ്ങളിലെ സാംസ്കാരിക പരിപാടികളിൽ ഇതര മതസ്ഥരുടെ ഭക്തിഗാനങ്ങൾ ആലപിക്കുന്നത് ഹൈന്ദവ ആചാരങ്ങളെ ഹനിക്കുന്നതാണെന്ന നിലപാടിലാണ് ഹിന്ദു ഐക്യവേദി. അതേസമയം, നന്ദഗോവിന്ദം ഭജൻസിന്റെ പ്രകടനത്തെ അനുകൂലിച്ചും പ്രതികൂലിച്ചും സമൂഹമാധ്യമങ്ങളിൽ ചർച്ചകൾ കൊഴുക്കുകയാണ്.