കോവളം: പൈതൃകത്തിന്റെ പെരുമയും ആധുനികതയുടെ ആവേശവും സമന്വയിപ്പിച്ച് കേരള ആർട്സ് ആൻഡ് ക്രാഫ്റ്റ്സ് വില്ലേജ് (KACV) അന്താരാഷ്ട്ര വനിതാ ദിനാഘോഷങ്ങളുടെ ഭാഗമായി ‘WOW’ വുമൺസ് വീക്ക് സംഘടിപ്പിക്കുന്നു.
ടികർ ഇവന്റ്സുമായി സഹകരിച്ച് മാർച്ച് 6 മുതൽ 8 വരെ നീളുന്ന വിപുലമായ കലാപരിപാടികളാണ് വില്ലേജിൽ ഒരുക്കിയിരിക്കുന്നത്.
മാർച്ച് 6: ‘ഗോസിപ്പ്’ – കഥകളി ഫ്യൂഷൻ
ആഘോഷങ്ങൾക്ക് തുടക്കമായി ‘ഗോസിപ്പ്’ എന്ന തിയേറ്റർ ഡാൻസ് അരങ്ങേറും. കഥകളിയുടെ ആഢ്യത്തവും സമകാലീന നൃത്തത്തിന്റെ ലാളിത്യവും ഒരുമിക്കുന്ന ഈ അവതരണം പാരമ്പര്യവും പുതുമയും തമ്മിലുള്ള സൃഷ്ടിപരമായ സംവാദമാകും. പൂർണ്ണ വേഷത്തിലുള്ള കഥകളി കലാകാരനും ആധുനിക നർത്തകരും അണിനിരക്കുന്ന ഈ ആവിഷ്കാരം പ്രേക്ഷകർക്ക് പുതുമയാർന്ന ദൃശ്യാനുഭവം സമ്മാനിക്കുമെന്ന് ക്രാഫ്റ്റ്സ് വില്ലേജ് ചീഫ് ഓപ്പറേറ്റിങ് ഓഫീസർ ടി. യു. ശ്രീപ്രസാദ് അറിയിച്ചു.
മാർച്ച് 7: ‘രംഗോത്സവ് 2026’ – ഹോളി ആഘോഷം
ഹോളി ആഘോഷങ്ങളുടെ ഭാഗമായി ‘രംഗോത്സവ് 2026’ സംഘടിപ്പിക്കും. ലൈവ് ഡി.ജെ, ഡോൾ മേളം, ലേസർ ദർബുക എന്നിവയോടൊപ്പം ഫോം പാർട്ടി, റെയിൻ ഡാൻസ്, സെൽഫി പോയിന്റുകൾ, ഗെയിമുകൾ, ഭക്ഷണ സ്റ്റാളുകൾ എന്നിവയും ഒരുക്കിയിട്ടുണ്ട്. പരിസ്ഥിതി സൗഹൃദമായ ഹെർബൽ നിറങ്ങൾ മാത്രമാണ് ആഘോഷത്തിനായി ഉപയോഗിക്കുക.
മാർച്ച് 8: രാജാ രവിവർമ്മ ചിത്രാവിഷ്കാരം
ആഘോഷങ്ങളുടെ സമാപനമായി അന്താരാഷ്ട്ര വനിതാ ദിനമായ മാർച്ച് 8-ന് രാജാ രവിവർമ്മയുടെ പ്രശസ്ത കൃതി ‘A Galaxy of Musicians’ ആസ്പദമാക്കി തിയേറ്റർ നൃത്താവിഷ്കാരം അരങ്ങേറും. ഭാരതീയ സ്ത്രീത്വത്തിന്റെ വിവിധ ഭാവങ്ങളും ദേശീയ ഐക്യത്തിന്റെ സന്ദേശവും വേദിയിൽ പുനർസൃഷ്ടിക്കുന്ന ഈ അവതരണം വനിതാ ദിനത്തിന് സമുചിതമായ ആദരമാകുമെന്ന് സംഘാടകർ വ്യക്തമാക്കി.
Kerala Arts and Crafts Village (KACV), Kovalam, is organizing the ‘WOW’ Women’s Week from March 6 to 8 in association with Tiqr Events as part of International Women’s Day celebrations. The event features a Kathakali-contemporary fusion dance titled ‘Gossip’, Holi celebrations under ‘Rangotsav 2026’, and a grand theatrical dance performance inspired by Raja Ravi Varma’s painting A Galaxy of Musicians on March 8.