തിരുവനന്തപുരം: സംസ്ഥാനത്ത് തുടർച്ചയായ അഞ്ചാം ദിവസവും സ്വർണവില ഇടിഞ്ഞു. ഇന്ന് പവന് 560 രൂപ കുറഞ്ഞതോടെ ഒരു പവൻ സ്വർണത്തിന്റെ വിപണിവില 1,18,880 രൂപയായി. ഗ്രാമിന് 70 രൂപ കുറഞ്ഞ് 14,860 രൂപ എന്ന നിലയിലാണ് വില.
ഇന്നലെ ഒരേ ദിവസം രണ്ട് തവണ വില കുറഞ്ഞതും ശ്രദ്ധേയമാണ്. കഴിഞ്ഞ നാല് ദിവസത്തിനിടെ മാത്രം പവന് ഏകദേശം 7,000 രൂപ കുറഞ്ഞിട്ടുണ്ട്. ഇതോടെ ഈ മാസത്തിലെ ഏറ്റവും താഴ്ന്ന നിരക്കിലാണ് ഇപ്പോൾ സ്വർണവില എത്തിയത്.
ഇപ്പോൾ ഒരു ഗ്രാം 24 കാരറ്റ് സ്വർണത്തിന് 16,211 രൂപയും പവന് 1,29,688 രൂപയുമാണ് വില. 18 കാരറ്റ് സ്വർണത്തിന് ഒരു ഗ്രാമിന് 12,158 രൂപയും പവന് 97,264 രൂപയുമാണ് വിപണിനിരക്ക്.
അതേസമയം സ്വർണവില കുറഞ്ഞ സാഹചര്യത്തിൽ ആഭരണം വാങ്ങാൻ പോകുന്നവർ ചില കാര്യങ്ങൾ ശ്രദ്ധിക്കണം. വിപണിയിലെ സ്വർണവില മാത്രം അടിസ്ഥാനമാക്കി ആഭരണത്തിന്റെ അന്തിമവില നിശ്ചയിക്കില്ല. പണിക്കൂലി, ജിഎസ്ടി, ഹാൾമാർക്ക് ചാർജ് എന്നിവ കൂടി ചേർന്നാണ് വില കണക്കാക്കുന്നത്.
ഉദാഹരണത്തിന് 5% പണിക്കൂലി, 3% ജിഎസ്ടി, 53.10 രൂപ ഹാൾമാർക്ക് ചാർജ് എന്നിവ ഉൾപ്പെടുത്തിയാൽ ഒരു പവൻ സ്വർണാഭരണം വാങ്ങാൻ ഏകദേശം 1.35 ലക്ഷം രൂപ വരെ ചെലവാകാൻ സാധ്യതയുണ്ട്.