കൊച്ചി: ക്രിക്കറ്റ് ലോകത്ത് പുതുചരിത്രം കുറിച്ചുകൊണ്ട് കേരളത്തിൽ ആരംഭിച്ച സി.സി.എഫ് 100X (CCF 100X) പ്രീമിയർ ലീഗ് രണ്ടാം സീസണിൽ സീഹോഴ്സ് സെയ്ലേഴ്സ് ജേതാക്കളായി. ആവേശം വാനോളമുയർന്ന ഫൈനൽ പോരാട്ടത്തിൽ ചീറ്റ ചേസേഴ്സിനെ പരാജയപ്പെടുത്തിയാണ് സീഹോഴ്സ് കിരീടം ചൂടിയത്.
സീഹോഴ്സ് സെയ്ലേഴ്സിന്റെ വിജയത്തിന് പിന്നിൽ ടീം ഉടമ പ്രഭീരാജിന്റെ കൃത്യമായ സ്ട്രാറ്റജികളും സെലിബ്രിറ്റി ഓണറായ നടൻ ഉണ്ണി മുകുന്ദന്റെ സാന്നിധ്യവും വലിയ പങ്കുവഹിച്ചു. സി.സി.എൽ സെമിഫൈനൽ വരെ എത്തിയ കേരള സ്ട്രൈക്കേഴ്സ് ടീമിലെ ഉണ്ണി മുകുന്ദന്റെ പോരാട്ടവീര്യം ഈ ടൂർണമെന്റിലും സീഹോഴ്സിന് കരുത്തായി. ആദ്യ മത്സരത്തിൽ ലയൺ ലെജൻഡ്സിനെതിരെ വിക്കറ്റൊന്നും നഷ്ടപ്പെടുത്താതെ 204 റൺസ് പിന്തുടർന്ന് വിജയിച്ച ഉണ്ണി മുകുന്ദന്റെയും ഷാനിഫ് മരക്കാരുടെയും പ്രകടനം ടൂർണമെന്റിലെ ശ്രദ്ധേയമായ ഒന്നായിരുന്നു.
ഫൈനലിൽ 44 പന്തിൽ 72 റൺസ് നേടി പുറത്താകാതെ നിന്ന സമർത്ഥിന്റെ വെടിക്കെട്ട് ബാറ്റിംഗാണ് സീഹോഴ്സിനെ അനായാസ വിജയത്തിലേക്ക് നയിച്ചത്. ടൂർണമെന്റിലെ മികച്ച താരമായി തിരഞ്ഞെടുക്കപ്പെട്ടതും സമർത്ഥ് തന്നെ. മത്സരത്തിൽ സീഹോഴ്സ് സെയ്ലേഴ്സ് ഒന്നാം സ്ഥാനവും 5 ലക്ഷം രൂപ ക്യാഷ് പ്രൈസും കരസ്ഥമാക്കി. ചീറ്റ ചേസേഴ്സ് രണ്ടാം സ്ഥാനവും റൈനോ റേഞ്ചേഴ്സ് മൂന്നാം സ്ഥാനവും നേടി.
ലോക ക്രിക്കറ്റിൽ തന്നെ ആദ്യമായി കേരളത്തിൽ അവതരിപ്പിച്ച സി.സി.എഫ് 100X എന്ന പുതിയ ഫോർമാറ്റിന് പിന്നിൽ റിനീഷ് അബ്ദുൾ ഖാദർ, സുദീപ് കരാട്ട് എന്നിവരുടെ ബുദ്ധികേന്ദ്രങ്ങളാണുള്ളത്. സി.സി.എഫ് എക്സിക്യൂട്ടീവ് അംഗങ്ങൾ കൂടിയായ ഇവരുടെ നേതൃത്വത്തിലാണ് ഈ വേറിട്ട ടൂർണമെന്റ് അരങ്ങേറിയത്.
യുവതാരം ഷെയ്ൻ നിഗം മുഖ്യാതിഥിയായി എത്തിയ ചടങ്ങിൽ വിജയികൾക്കുള്ള ട്രോഫികളും പുരസ്കാരങ്ങളും വിതരണം ചെയ്തു. സീഹോഴ്സിന്റെ ബ്രാൻഡ് അംബാസഡറായ നടി മഹിമ നമ്പ്യാർക്ക് സിനിമാ ഷൂട്ടിംഗ് തിരക്കുകൾ കാരണം ഫൈനൽ ചടങ്ങിൽ പങ്കെടുക്കാൻ സാധിച്ചില്ല. മികച്ച ജനപങ്കാളിത്തത്തോടെ സമാപിച്ച സി.സി.എഫ് 100X രണ്ടാം സീസൺ കേരളത്തിലെ ക്രിക്കറ്റ് പ്രേമികൾക്ക് പുത്തൻ അനുഭവമാണ് സമ്മാനിച്ചത്.