എറണാകുളം: പനങ്ങാട് എംഎൽഎ റോഡിൽ നടത്തിയ പ്രത്യേക പരിശോധനയിൽ 176 ഗ്രാം എംഡിഎംഎ (MDMA)യുമായി യുവാവ് പിടിയിലായി. DANSAF സംഘമാണ് പ്രതിയെ പിടികൂടിയത്.
മരോട്ടിക്കൽ ഹൗസ്, ഉദയത്തുംവാതിൽ, പനങ്ങാട്, എറണാകുളം സ്വദേശിയായ സജിത്ത് വേണു (36) ആണ് പിടിയിലായത്. എറണാകുളത്ത് യുവാക്കൾക്കിടയിൽ എംഡിഎംഎ വിതരണം ചെയ്യുന്നതിലെ മുഖ്യ കണ്ണിയാണ് പ്രതിയെന്ന് പൊലീസ് അറിയിച്ചു.
പ്രതിയുടെ വീട്ടിൽ നടത്തിയ പരിശോധനയിൽ 176 ഗ്രാം എംഡിഎംഎയ്ക്കൊപ്പം മയക്കുമരുന്ന് കച്ചവടത്തിലൂടെ സമ്പാദിച്ചതായി സംശയിക്കുന്ന ₹1,02,000 രൂപയും പോലീസ് കണ്ടെടുത്തു.
എറണാകുളം സിറ്റി പോലീസ് കമ്മീഷണർ കാളിരാജ് മഹേഷ് കുമാർ IPSയുടെ നിർദേശപ്രകാരം, അശ്വതി ജിജി IPS, ഷാഹിൻഷാ IPS എന്നിവരുടെ മേൽനോട്ടത്തിൽ നാർക്കോട്ടിക് സെൽ അസിസ്റ്റന്റ് കമ്മീഷണർ ടി.ഡി. സുനിൽകുമാറിന്റെ നേതൃത്വത്തിലുള്ള DANSAF സംഘമാണ് നടപടി സ്വീകരിച്ചത്.
പ്രതിക്കെതിരെ എൻഡിപിഎസ് നിയമപ്രകാരം കേസെടുത്തതായി പൊലീസ് അറിയിച്ചു. തുടർ അന്വേഷണങ്ങൾ പുരോഗമിക്കുകയാണ്