കോട്ടയം: വരാനിരിക്കുന്ന നിയമസഭാ തെരഞ്ഞെടുപ്പിൽ പാലാ മണ്ഡലത്തിൽ എൽഡിഎഫ് സ്ഥാനാർത്ഥിയായി കേരള കോൺഗ്രസ് ചെയർമാൻ ജോസ് കെ മാണി തന്നെ മത്സരിക്കുമെന്ന് മന്ത്രി റോഷി അഗസ്റ്റിൻ വ്യക്തമാക്കി. മാധ്യമ പ്രവർത്തകരുടെ ചോദ്യത്തിന് ജോസ് കെ മാണി മറുപടി പറയാനിരിക്കെ മൈക്ക് ഏറ്റെടുത്താണ് റോഷി ഇക്കാര്യം അറിയിച്ചത്.
“ജോസ് കെ മാണി മത്സരിക്കും — അതിൽ സംശയമില്ല. ഇത് പാർട്ടിയുടെ തീരുമാനമാണ്. അദ്ദേഹം സജ്ജമായി രംഗത്തിറങ്ങി സജീവമായി മത്സരിക്കും,” എന്നാണ് റോഷി അഗസ്റ്റിൻ പറഞ്ഞത്. പാലാ മണ്ഡലത്തിൽ തന്നെയാകും അദ്ദേഹത്തിന്റെ മത്സരം എന്നും മന്ത്രി കൂട്ടിച്ചേർത്തു.
ഇതിനിടെ സിറ്റിംഗ് എംഎൽഎ മാണി സി കാപ്പന്റെ വിമർശനങ്ങൾക്ക് ജോസ് കെ മാണി മറുപടി നൽകി. തന്റെ കഴിവുകേട് മറച്ചുവെക്കാനാണ് കാപ്പൻ ശ്രമിക്കുന്നതെന്ന് അദ്ദേഹം ആരോപിച്ചു. ആരാണ് മത്സരിക്കേണ്ടതെന്ന് പാർട്ടി തീരുമാനിക്കുമെന്നും അതനുസരിച്ച് മുന്നോട്ട് പോകുമെന്നും ജോസ് കെ മാണി പറഞ്ഞു.