തിരുവനന്തപുരം: മോഹൻലാൽ കെഎസ്ആർടിസിയുടെ ഗുഡ് വിൽ അംബാസിഡറാകുമെന്നും പ്രതിഫലം വാങ്ങാതെയാണ് ഈ സേവനമെന്നും അറിയിച്ചു മന്ത്രി കെ.ബി. ഗണേഷ് കുമാർ. ടിക്കറ്റ് വരുമാനത്തിൽ കെഎസ്ആർടിസി ചരിത്ര നേട്ടം കൈവരിച്ചതിൽ പ്രതികരിക്കുമ്പോഴാണ് മന്ത്രി ഇക്കാര്യം വ്യക്തമാക്കിയത്.
12 കോടി 18 ലക്ഷം രൂപയാണ് ടിക്കറ്റ് വരുമാനം എന്നാണ് ലഭിക്കുന്ന വിവരം. ടിക്കറ്റിതര വരുമാനം കൂടെ കൂട്ടി ആകെ 13 കോടി 2 ലക്ഷം രൂപ വരുമാനം ലഭിച്ചുവെന്നും കൂട്ടായ സഹകരണമാണ് ഈ നേട്ടത്തിന് കാരണമെന്നും കെ.ബി. ഗണേഷ് കുമാർ വ്യക്തമാക്കി.
രാജ്യത്ത് പൂർണമായി ഡിജിറ്റലൈസ് ചെയ്ത കോർപറേഷനാണ് കെഎസ്ആർടിസി. ഇടതു മുന്നണി സർക്കാരാണ് കെഎസ്ആർടിസിയെ തിരികെ കൊണ്ട് വന്നത്. സ്വതന്ത്രമായി പ്രവർത്തിക്കാൻ മുഖ്യമന്ത്രി പിണറായി വിജയൻ പൂർണ പിന്തുണ നൽകി. പണം എറിഞ്ഞാണ് പണം നേടിയത്. ജനങ്ങൾ ആഗ്രഹിച്ച ചെറിയ ചെറിയ മാറ്റങ്ങൾ വരുത്തിയാണ് ഈ നേട്ടമെന്നും കെ.ബി. ഗണേഷ് കൂട്ടിച്ചേർത്തു.