തിരുവനന്തപുരം: മിഷൻ കേരളയുടെ ഭാഗമായി തലസ്ഥാനത്തെത്തിയ പ്രധാനമന്ത്രി നരേന്ദ്ര മോദിയുടെ റോഡ് ഷോക്ക് തിരുവനന്തപുരത്ത് തുടക്കമായി. വിമാനത്താവളത്തിലെത്തിയ പ്രധാനമന്ത്രിയെ മുഖ്യമന്ത്രിയും ഗവർണറും ചേർന്നാണ് സ്വീകരിച്ചത്.
രാവിലെ 11 മണിയോടെ ബിജെപി പ്രവർത്തകരുടെ ആവേശത്തിനിടയിൽ മോദിയുടെ റോഡ് ഷോ ആരംഭിച്ചു. പുത്തരിക്കണ്ടം മൈതാനത്തേക്കാണ് പ്രധാനമന്ത്രി എത്തിയത്. പ്രധാനമന്ത്രിയെ കാണാനായി റോഡിന്റെ ഇരുവശങ്ങളിലും വലിയ തോതിൽ പ്രവർത്തകർ കാത്തുനിന്നിരുന്നു. റോഡ് ഷോയുടെ മുഴുവൻ സമയവും പ്രധാനമന്ത്രി പ്രവർത്തകരെ കൈവീശി അഭിവാദ്യം ചെയ്തു.
പ്രധാനമന്ത്രിയുടെ സന്ദർശനത്തിൽ നിർണായക പ്രഖ്യാപനങ്ങൾ ഉണ്ടാകുമെന്ന പ്രതീക്ഷയിലാണ് കേരളം. അതിവേഗ റെയിൽ പദ്ധതിയുമായി ബന്ധപ്പെട്ട പ്രഖ്യാപനങ്ങൾ ഉൾപ്പെടെ ഉണ്ടാകാമെന്ന സൂചനകൾ നേരത്തെ പുറത്തുവന്നിരുന്നു. കൂടാതെ അമൃത് ഭാരത് ട്രെയിനുകൾ പ്രധാനമന്ത്രി ഫ്ലാഗ് ഓഫ് ചെയ്യുമെന്നും അറിയിച്ചിട്ടുണ്ട്.