തിരുവനന്തപുരം: പാലക്കാട് നിയമസഭാ മണ്ഡലത്തില് വനിതാ സ്ഥാനാര്ത്ഥിയെ പരിഗണിക്കാന് കോണ്ഗ്രസില് ആലോചന. തെരഞ്ഞെടുപ്പ് തന്ത്രജ്ഞന് സുനില് കനഗോലുവിന്റെ നിര്ദ്ദേശപ്രകാരമാണിത്.
ലൈംഗിക പീഡന പരാതിയെ തുടര്ന്ന് കോണ്ഗ്രസില് നിന്നും പുറത്താക്കപ്പെട്ട രാഹുല് മാങ്കൂട്ടത്തിലിന് പകരം പാലക്കാട് നിയമസഭാ മണ്ഡലത്തില് വനിതാ സ്ഥാനാര്ത്ഥിയെ മത്സരിപ്പിക്കുന്നത് ഗുണകരമാകുമെന്നാണ് വിലയിരുത്തൽ.
കെപിസിസി ജനറല് സെക്രട്ടറി കെ.എ. തുളസി, കോണ്ഗ്രസ് പോഷക സംഘടനയായ ശാസ്ത്ര വേദിയുടെ ജില്ലാ അധ്യക്ഷ ലക്ഷ്മി ആര്. ചന്ദ്രന് എന്നിവരുടെ പേരുകളാണ് ഉയര്ന്നിരിക്കുന്നത്. കെ. എ. തുളസിയും ലക്ഷ്മി ആര്. ചന്ദ്രനും പാലക്കാട് നെന്മാറ എന്എസ്എസ് കോളജിലെ അധ്യാപകരാണ്. പാലക്കാട് എംപി വി. കെ ശ്രീകണ്ഠന്റെ ഭാര്യയാണ് കെ. എ തുളസി.
അതേസമയം പാലക്കാട് ഡിസിസി പ്രസിഡന്റ് എ. തങ്കപ്പന്റെയും, ബിജെപിയില് നിന്നും കോണ്ഗ്രസില് എത്തിയ സന്ദീപ് വാര്യരുടെയും പേരുകളും പാലക്കാട് നിയമസഭ മണ്ഡലത്തില് കോണ്ഗ്രസ് പരിഗണിക്കുന്നുണ്ട്.