തിരുവനന്തപുരം: മുട്ടടയിലെ കോൺഗ്രസ് സ്ഥാനാർത്ഥി വൈഷ്ണ സുരേഷിന്റെ പേര് വോട്ടർ പട്ടികയിൽ പുനഃസ്ഥാപിച്ചു. സംസ്ഥാന തിരഞ്ഞെടുപ്പ് കമ്മീഷനാണ് ഇക്കാര്യത്തിൽ തീരുമാനമെടുത്തത്.
വോട്ടർ പട്ടികയിൽ നിന്ന് വൈഷ്ണയുടെ പേര് നീക്കം ചെയ്യാൻ സ്വീകരിച്ച നടപടി റദ്ദാക്കിയതോടെ, മുട്ടടയിൽ വൈഷ്ണയ്ക്ക് മത്സരിക്കുന്നതിനുള്ള തടസ്സങ്ങൾ നീങ്ങി.
വൈഷ്ണയുടെ പേര് തിരുവനന്തപുരം മുനിസിപ്പല് കോര്പ്പറേഷന് 27-ാം വാര്ഡ്, മുട്ടട പാര്ട്ട് നമ്പര് 5-ലെ വോട്ടര് പട്ടികയില് പുനസ്ഥാപിക്കാന് കമ്മിഷന് ഉത്തരവിട്ടു. ഇന്നു തന്നെ പേര് പുനസ്ഥാപിച്ച് കമ്മിഷനെ അറിയിക്കണമെന്നും കോര്പ്പറേഷന് ഇലക്ടറല് റജിസ്ട്രേഷന് ഓഫീസര്ക്കു നിര്ദേശം നല്കിയിട്ടുണ്ട്.
ഹൈക്കോടതി ഉത്തരവിന്റെ അടിസ്ഥാനത്തില് ഇന്നലെ തിരഞ്ഞെടുപ്പ് കമ്മിഷന് ഹിയറിങ് നടത്തിയിരുന്നു. ഇതിനു ശേഷമാണ് വോട്ട് പുനഃസ്ഥാപിക്കാന് തീരുമാനം എടുത്തത്.
വോട്ടര് അപേക്ഷയില് കെട്ടിട നമ്പര് തെറ്റായി രേഖപ്പെടുത്തിയെന്നു കാട്ടി സിപിഎം പ്രവര്ത്തകന് നല്കിയ പരാതിയുടെ അടിസ്ഥാനത്തിലാണ് വൈഷ്ണയുടെ പേര് വോട്ടര് പട്ടികയില്നിന്ന് ഒഴിവായത്.