തിരുവനന്തപുരം: വർക്കലയിൽ തെരുവുനായ ആക്രമണത്തിൽ അഞ്ച് വയസുകാരിക്ക് പരിക്ക്. ഇന്ന് രാവിലെയാണ് സംഭവം. വെട്ടൂരിലെ ഷെഹീർ- ആമിന ദമ്പതികളുടെ മകൾക്കാണ് ആക്രമണത്തിൽ പരിക്കേറ്റത്. മദ്രസ പഠനം കഴിഞ്ഞ് കുട്ടി വീട്ടിലേക്ക് പോകുന്നതിനിടെയാണ് തെരുവ്നായ ആക്രമിച്ചത്.
മുഖത്തും കൈകാലുകളിലും നായയുടെ ആക്രമണത്തിൽ ആഴത്തിൽ മുറിവേറ്റിട്ടുണ്ട്. കുട്ടിയുടെ നിലവിളികേട്ട് നാട്ടുകാർ ഓടിയെത്തിയപ്പോൾ നായ പിടിവിടാതെ നിൽക്കുകയായിരുന്നു. പിന്നീട് നാട്ടുകാർ കല്ലെറിഞ്ഞ് നായയെ വിരട്ടി ഓടിക്കുകയായിരുന്നു. വർക്കല താലൂക്ക് ആശുപത്രിയിൽ കുട്ടിയ്ക്ക് ചികിത്സ നൽകി. നിലവിൽ കുട്ടിയുടെ നില ഗുരുതരമല്ലെന്നാണ് അറിഞ്ഞത്.
മറ്റൊരു സംഭവത്തിൽ കഴിഞ്ഞ ദിവസം ആലപ്പുഴ ചേർത്തലയിൽ സ്ഥാനാർഥിയെ തെരുവുനായ ആക്രമിച്ചത്. ചേർത്തല നഗരസഭ 15ാം വാർഡായ ചക്കരക്കുളത്തെ യുഡിഎഫ് സ്ഥാനാർഥിയായ ഹരിതയെ ആണ് തെരുവുനായ ആക്രമിച്ചത്. തെരഞ്ഞെടുപ്പ് പ്രചാരണത്തിനിടെയാണ് സ്ഥാനാർഥിക്ക് തെരുവുനായയുടെ കടിയേറ്റത്. മാമ്പല ഭാഗത്തുവച്ച് തെരുവുനായ തോൾ ഭാഗത്ത് കടിക്കുകയായിരുന്നു. പരിക്കേറ്റ ഹരിത ആലപ്പുഴ വണ്ടാനം മെഡിക്കൽ കോളജ് ആശുപത്രിയിൽ ഹരിത ചികിത്സ തേടി.