ന്യൂഡൽഹി: 75-ാം പിറന്നാളിലേക്ക് അടുക്കുന്ന പ്രധാനമന്ത്രി നരേന്ദ്ര മോദിക്ക് സമ്മാനം നൽകി ഫുട്ബോൾ ഇതിഹാസം ലയണൽ മെസ്സി. 2022-ൽ കപ്പ് ഉയർത്തിയപ്പോൾ ധരിച്ചിരുന്ന തന്റെ ഓട്ടോഗ്രാഫ് പതിച്ച ഒരു ജേഴ്സിയാണ് മെസ്സി മോദിക്ക് സമ്മാനമായി അയച്ചത്. സെപ്റ്റംബർ 17നാണ് മോദിയുടെ ജന്മദിനം.
ഡിസംബറിൽ ഇന്ത്യയിൽ പര്യടനം നടത്തുന്ന മെസ്സി പ്രധാനമന്ത്രിയെ കണ്ടേക്കുമെന്നും റിപ്പോർട്ടുകളുണ്ട്. ഡിസംബർ 13 മുതൽ 15 വരെ മെസ്സി ഇന്ത്യയിലുണ്ടാകും. കൊൽക്കത്തയിലും മുംബൈയിലുമായിരിക്കും പര്യടനം എന്നാണ് സൂചന. പ്രധാനമന്ത്രിയുമായുള്ള കൂടിക്കാഴ്ച പിന്നീട് നടക്കും.
അതേസമയം, മെസി ഉള്പ്പെടുന്ന അര്ജന്റീയുടെ ഫുട്ബോള് ടീം കേരളത്തില് നവംബറിലാണ് എത്തുക. നവംബര് 10നും 18നും ഇടയിലുള്ള ദിവസങ്ങളിലായിരിക്കും അര്ജന്റീന ടീമിന്റെ കേരള സന്ദര്ശനം.
ഫിഫ അനുവദിച്ച നവംബർ വിൻഡോയിൽ ലുവാണ്ട, കേരളം എന്നിവിടങ്ങളിൽ നവംബർ 10നും 18നും ഇടയിൽ അർജൻ്റീന ഫുട്ബോൾ ടീം കളിക്കുമെന്നാണ് എഎഫ്എ അറിയിച്ചത്. കേരള സര്ക്കാരുമായി ചേര്ന്ന് റിപ്പോര്ട്ടര് ബ്രോഡ്കാസ്റ്റിംഗ് കമ്പനി പ്രൈവറ്റ് ലിമിറ്റഡാണ് ഫുട്ബോള് ലോക ജേതാക്കളെ കേരളത്തിലെത്തിക്കുന്നത്.