കൊച്ചി: പാലിയേക്കരയില് ടോള് പിരിവ് പുനഃരാരംഭിക്കാന് അനുമതി നല്കാമെന്ന് വ്യക്തമാക്കി ഹൈക്കോടതി. ഇതുമായി ബന്ധപ്പെട്ട ഉത്തരവ് തിങ്കളാഴ്ച്ച പുറത്തിറക്കും എന്നാണ് ലഭിക്കുന്ന റിപ്പോർട്ട്.
അതേസമയം ഉപാധികളോടെയാവും അനുമതിയെന്ന് ഹൈക്കോടതി വ്യക്തമാക്കി. നിലവിലെ പ്രശ്നങ്ങള് പരിഹരിക്കപ്പെട്ടാലും കേസ് അവസാനിപ്പിക്കില്ലെന്നും ഇടക്കാല ഗതാഗത മാനേജ്മെന്റ് കമ്മിറ്റി പരിശോധന തുടരണമെന്നും ഹൈക്കോടതി വ്യക്തമാക്കി. കൃത്യമായ ഇടവേളകളില് കമ്മിറ്റി പരിശോധന നടത്തണമെന്നും ഹൈക്കോടതി കൂട്ടിച്ചേർത്തു.
ദേശീയപാതയിലെ നിര്മാണ പ്രവര്ത്തനങ്ങള് മൂലം ഗതാഗതകുരുക്കുണ്ടാകുന്നതു ചൂണ്ടിക്കാട്ടി കഴിഞ്ഞ മാസം ആറിനാണ് കോടതി ടോള് പിരിവ് ആദ്യം ഒരുമാസത്തേക്ക് തടഞ്ഞത്. പിന്നാലെ ഇത് നീട്ടുകയായിരുന്നു.