പാലക്കാട്: സ്വകാര്യ ബസിൽ വെച്ച് കുഴഞ്ഞുവീണ യാത്രക്കാരിയെ ഉടൻ തന്നെ ആശുപത്രിയിലെത്തിച്ച് ബസ് ജീവനക്കാർ. മണ്ണാർക്കാട് ഷൊർണൂർ റൂട്ടിൽ സർവീസ് നടത്തുന്ന പി കെ എസ് ബസ് ജീവനക്കാരാണ് യാത്രക്കാരിയെ ആശുപത്രിയിലെത്തിച്ചത്. യാത്രക്കാരിയുടെ ജീവൻ രക്ഷിക്കുക എന്ന ലക്ഷ്യത്തോടെ ബസ് നേരെ സ്വകാര്യ ആശുപത്രിയിലേക്ക് കയറ്റുകയായിരുന്നു.
ഞായറാഴ്ച രാത്രി ഏഴുമണിയോടെയാണ് സംഭവം. യാത്രക്കാരി മഞ്ജു നാഥാണ് ബസിനുള്ളിൽ വെച്ച് കുഴഞ്ഞുവീണ് അബോധാവസ്ഥയിൽ ആയത്. തൃക്കടിയിൽ സ്വദേശിയായ ഡ്രൈവർ നിയാസും, കോതകുർശ്ശി കുറ്റിക്കോട് സ്വദേശിയായ കണ്ടക്ടർ ജയേഷും ചേർന്നാണ് മഞ്ജുവിനെ അതേ ബസിൽ തന്നെ ആശുപത്രിയിൽ എത്തിച്ചത്.