കോട്ടയം: കോട്ടയം മെഡിക്കല് കോളേജില് തകര്ന്നുവീണ ശുചിമുറിയുടെ കെട്ടിടാവശിഷ്ടങ്ങള്ക്കിടയില് നിന്നും കണ്ടെത്തിയ സ്ത്രീ മരിച്ചു.
സ്ഥലത്ത് ജെസിബി എത്തിച്ച് നടത്തിയ പരിശോധനയിലാണ് സ്ത്രീയെ കണ്ടെത്തിയത്. ഇതോടെ പ്രദേശത്ത് സംഘര്ഷാവസ്ഥ ഉണ്ടായി. പുറത്തെടുക്കുമ്പോള് തന്നെ ജീവനില്ലായിരുന്നുവെന്നും സ്ഥിരീകരിക്കാത്ത റിപ്പോർട്ടുണ്ട്. അപകടമുണ്ടായി രണ്ടര മണിക്കൂറിന് ശേഷമാണ് ഇവരെ പുറത്തെടുത്തത്.
കെട്ടിടം തകര്ന്നതിന് പിന്നാലെ ഒരാളെ കാണാനില്ലെന്ന് പരാതി ഉയര്ന്നിരുന്നു. ബിന്ദുവെന്ന സ്ത്രീയെ കാണാനില്ലെന്നാരോപിച്ച് ഭര്ത്താവാണ് പരാതി നല്കിയത്.
തലയോലപ്പറമ്പ് സ്വദേശി മേപ്പോത്ത്കുന്ന് ബിന്ദുവിനെയാണ് കാണാതായത്.
കുളിക്കാന് പോയതിനാല് ബിന്ദു ഫോണ് കയ്യില് കരുതിയില്ലെന്നും ഭര്ത്താവ് വിശ്രുതന് പറയുന്നു. 13ാം വാര്ഡിലാണ് ബിന്ദു പോയതെന്നും 13, 14 വാര്ഡിലുള്ളവര് 14-ാം വാര്ഡിലാണ് പ്രാഥമിക കൃത്യങ്ങള്ക്കായി പോകുന്നതെന്നും ഇവര് പറയുന്നു.