കൊല്ലം: ചിതറയിൽ ഹോട്ടലിൽ നിന്നും വാങ്ങിയ ബിരിയാണിയിൽ കുപ്പിച്ചില്ല്. കുപ്പിച്ചില്ല് കുടുങ്ങി തൊണ്ട മുറിഞ്ഞ കിളിത്തട്ട് സ്വദേശിയായ യുവാവ് ആശുപത്രിയിൽ ചികിത്സ തേടി. ചിതറ ഗ്രാമപഞ്ചായത്തിലെ താൽക്കാലിക ജീവനക്കാരനായ സൂരജിനെയാണ് കുപ്പിച്ചില്ല് തൊണ്ടയിൽ കുരുങ്ങിയതിനെ തുടർന്ന് ആശുപത്രിയിൽ എത്തിച്ചത്. ചിതറ എൻആർ ഹോട്ടലിൽ നിന്നും സൂരജ് കഴിഞ്ഞ ദിവസം വാങ്ങിയ ബിരിയാണി പാഴ്സലിലാണ് കുപ്പിച്ചില്ല് കണ്ടെത്തിയത്. നാല് ബിരിയാണി പാഴ്സലായി വാങ്ങി വീട്ടിലെത്തി കഴിക്കുന്നതിനിടെയാണ് കുപ്പി ചില്ല് ലഭിച്ചത്.
എല്ല് ആണെന്ന് കരുതി എന്നാൽ ചില്ല് വായിൽ നിന്ന് പൊട്ടിയപ്പോൾ ആണ് മനസിലായത്. നിലവിൽ കടയ്ക്കൽ താലൂക്ക് ആശുപത്രിയിൽ ചികിത്സയിലാണ് യുവാവ്. അധികൃതർ കൃത്യമായി പരിശോധന നടത്താത് കൊണ്ടാണ് ഇത്തരത്തിൽ സംഭവങ്ങളുണ്ടാകുന്നതെന്ന് നാട്ടുകാർ ആരോപിച്ചു. ഹോട്ടലിനെതിരെ പൊലീസിലും ഭക്ഷ്യസുരക്ഷവിഭാഗത്തിനും പരാതി നൽകിയിട്ടുണ്ട്.