ലീഡ്സ്: മത്സരത്തിനിടെ ഇന്ത്യൻ ക്രിക്കറ്റ് താരം കെ.എൽ രാഹുലിന്റെ സ്വകാര്യഭാഗത്ത് പന്തുകൊണ്ടു. ഇംഗ്ലണ്ടിനെതിരായ ഒന്നാം ക്രിക്കറ്റ് ടെസ്റ്റിനിടെയാണ് സംഭവം. വേദന കൊണ്ട് പുളഞ്ഞ താരത്തെ ശ്രദ്ധിക്കാതെ പന്ത് എടുത്ത് പരിശോധിക്കുകയാണ് ഇംഗ്ലണ്ട് ക്യാപ്റ്റൻ ബെൻ സ്റ്റോക്ക്സ് ചെയ്തത്. ഇംഗ്ലണ്ടിനെതിരായ ക്രിക്കറ്റ് ടെസറ്റിന്റെ നാലാം ദിനത്തിലെ ഒന്നാം സെഷനിടെയുണ്ടായ സംഭവത്തിന്റെ ദൃശ്യങ്ങൾ സമൂഹ മാധ്യമങ്ങളിൽ വൈറലാണ്.
ബെൻ സ്റ്റോക്ക്സ് എറിഞ്ഞ പന്താണ് രാഹുലിന്റെ സ്വകാര്യ ഭാഗത്ത് ഇടിച്ചത്. സ്റ്റോക്ക്സ് എറിഞ്ഞ 47-ാം ഓവറിലെ അഞ്ചാം പന്താണ് രാഹുലിന്റെ സ്വകാര്യ ഭാഗത്ത് ഇടിച്ചത്. ഇതോടെ കടുത്ത വേദനയിൽ പുളഞ്ഞ രാഹുൽ ഗ്രൗണ്ടിൽ ഇരുന്നു. എന്നാൽ രാഹുലിനെ ശ്രദ്ധിക്കാൻ കൂട്ടാക്കാതെ പന്തെടുക്കാനായിരുന്നു ബെൻ സ്റ്റോക്ക്സിന് തിടുക്കം. രാഹുലിന്റെ അടുത്തകൂടി കടന്നുപോയ ബെൻ സ്റ്റോക്ക്സ് താരത്തോട് എന്തോ പറയുകയും ചെയ്തു.
എന്നാൽ രാഹുലിന്റെ പരിക്ക് പരിശോധിക്കുന്ന ഋഷഭ് പന്തിന്റെ ദൃശ്യങ്ങൾ സോഷ്യൽ മീഡിയയിൽ വൈറലായി. മത്സരത്തിൽ സെഞ്ചുറി നേടിയ ഇരുവരും ഇന്ത്യയെ 364 റൺസിലെത്തിക്കുന്നതിൽ നിർണായക പങ്കുവഹിച്ചു.