കൊച്ചി: കൊച്ചിയില് ഹൈബ്രിഡ് കഞ്ചാവുമായി സംവിധായകര് പിടിയില്. ഖാലിദ് റഹ്മാനും അഷ്റഫ് ഹംസയുമാണ് എക്സൈസിന്റെ പിടിയിലായത്. ഛായാഗ്രാഹകനും തിരക്കഥാകൃത്തുമായ സമീര് താഹിറിന്റെ ഫ്ളാറ്റില് നിന്നാണ് ഇരുവരെയും പിടികൂടിയത്. ഇവരുടെ കൈയില് നിന്ന് ഒന്നരഗ്രാം ഹൈബ്രിഡ് കഞ്ചാവും പിടിച്ചെടുത്തു. ഇരുവരുടെയും സുഹൃത്ത് ഷാലിഫ് മുഹമ്മദും പിടിയിലായിട്ടുണ്ട്. മൂന്ന് പേരെയും അറസ്റ്റ് ചെയ്ത് ജാമ്യത്തില് വിട്ടു.
രഹസ്യ വിവരത്തിന്റെ അടിസ്ഥാനത്തിലായിരുന്നു എക്സൈസ് പരിശോധന നടത്തിയത്. മൂവരും ലഹരി ഉപയോഗിക്കാന് തയ്യാറെടുക്കുന്നതിനിടെയാണ് ഇവര് പിടിയിലായത്. ഇവര്ക്ക് എവിടെ നിന്നാണ് ലഹരി ലഭിച്ചതെന്നതിനെക്കുറിച്ച് വിശദമായ അന്വേഷണം നടത്തുമെന്നും എക്സൈസ് അറിയിച്ചു.
ആലപ്പുഴ ജിംഖാനയാണ് ഖാലിദ് റഹ്മാന്റെ അവസാന സിനിമ. ഉണ്ട, തല്ലുമാല, അനുരാഗ കരിക്കിന് വെള്ളം, തുടങ്ങിയ ഹിറ്റ് സിനിമകളും ഖാലിദ് റഹ്മാന് സംവിധാനം ചെയ്തിട്ടുണ്ട്. മഞ്ഞുമ്മല് ബോയ്സ് എന്ന സിനിമയില് ശ്രദ്ധേയമായ വേഷവും ഖാലിദ് റഹ്മാന് ചെയ്തിട്ടുണ്ട്. തമാശ, ഭീമന്റെ വഴി തുടങ്ങിയ സിനിമകളുടെ സംവിധായകനാണ് അഷ്റഫ് ഹംസ. തല്ലുമാല എന്ന ഹിറ്റ് സിനിമയുടെ സഹരചിയതാവ് കൂടിയാണ് അഷ്റഫ് ഹംസ.